Мемлекеттік билік тарихы туралы анықтамалық

Президент архивінде «Қазақстан Республикасының мемлекеттік билік органдары» атты анықтамалық жарық көрді. Үш жылдан аса уақыт бойы дайындалған еңбекте елдің тәуелсіздік жылдарынан бастап бүгінгі институционалдық реформаларға дейінгі мемлекеттік басқару құрылымының эволюциясы қамтылған.

Құжаттық хроника 800 беттен, үш тараудан тұрады. Президент архивінің директоры Әлия Мұстафина басылым архившілер мен ғалымдардың бірнеше жылдық еңбегінің нәтижесі екенін атап өтті.

«Құжаттық тұрғыдан тексеріл­ген, шынайы ақпарат көзі бола алатын анықтамалық басылымды дайындау жұмысы бірнеше жылға созылды. Мұнда тек 1991 жылдан бергі мемлекеттік меке­мелердің тарихы ғана емес, сонымен қатар мемлекеттік басқару институттарының эволюциясы, саяси шешімдер қабылдау тетігі мен алгоритмінің көрінісі берілген. Басылымның елде баламасы әлі жоқ деп нық сеніммен айта аламын. Бұл – Президент архивінде қызмет ететін архивші-практиктер мен ғалымдардың шығармашылық одағының, түрлі мемлекеттік орган өкілдерінің еңбегінің нәтижесі», деді Ә.Мұстафина.

Анықтамалық – Президент архиві дайындаған серияның төртінші басылымы. Бұған дейін 2004, 2007, 2012 жылдары үш нұсқасы жарық көрді. Жаңа басылым барлық алдыңғы буындарды біріктіріп, 1991–2024 жылдар аралығындағы кезеңді қамтиды.

«Басылымның ерекше құн­дылығы – Президент архивінің қорлары. Мемлекеттік органдардың құрылуы, қызметі, құрылымы, өкілеттіктері, сондай-ақ қайта ұйымдастырылуы немесе жойылуы туралы қысқаша, бірақ тарихи дерегі нақты, ведомстволардың бағы­­ныстылығы мен ішкі құрылы­мын­дағы өзгерістері толық берілді. Мұн­дай жинақты көпшілікке жүйе­лі түрде үлкен тиражбен қазақ, орыс тілінде бірінші рет жинап отыр­мыз», деді Президент архиві дирек­торы­ның орынбасары Қайрат Әлімғазинов.

Кітап таныстырылымына мемлекеттік органдар мен ғылыми қауымдастық өкілдері қатысты. Соның ішінде Мәжіліс депутаты Еркін Әбіл, Мемлекеттік қызмет істері агенттігі төрағасының орынбасары Әлібек Ахмедьяр, Президент жанындағы Мемлекеттік басқару академиясының ректоры Азамат Жолманов бар. Олар басылымға жоғары баға берді.

Саяси ғылымдар докторы, профессор Жомарт Симтиков анықтамалықтың атқарушы билік органдары тарихына ғылыми бағытталған навигатор рөлін атқаратынын айтты.

«Бұл жинақ ғылыми мәнге ие, себебі ол мемлекеттік басқару тарихына қатысты жүйеленген құжаттар массивін ғылыми айналымға енгізеді, әкімшілік реформалардың тарихын зерттеуді дамытады, саяси тарих, құқықтану, архивтану саласында эмпирикалық база бола алады,» деді сарапшы.

Былтыр Президент архиві алты құжат жинағын, «Жаңа архив» журналының төрт санын оқырман назарына ұсынды. Тәуелсіздік жылдары Архив ел тарихындағы маңызды оқиғаларға арналған шамамен 90 құжаттық басылымды дайындаған. Олардың қатарында саяси қуғын-сүргінге ұшыраған азаматтардан бастап елдің қазіргі даму кезеңіне дейінгі деректер бар.

Соңғы жаңалықтар

Қазақстан мен Қырғызстан ТЖ саласындағы ынтымақтастықты нығайтуда

Қоғам • Кеше

Аида Балаева Алматы облысындағы туристік нысандардың дайындығын тексерді

Қоғам • Кеше

Ақтөбеде облыс әкімдігі ғимаратында өрт шықты

Оқиға • Кеше

Қазақстанда жаңа алты мұнай кен орны анықталды

Қазақстан • Кеше

Боксшы Оразбек Асылқұлов Азия чемпионатының финалына шықты

Спорт • Кеше

Жаңа Конституция – орнықты болашақ кепілі

Ата заң • Кеше

Киберқауіпсіздік пен ЖИ-ді дамыту: Елордада Palo Alto Networks компаниясымен кездесу өтті

Технология • Кеше

«Таза Қазақстан»: Елордалық кәсіпкерлерге тазалықты сақтау жөнінде чек-парақшалар таратылды

«Таза Қазақстан» • Кеше

Текелі ЖЭО-2 жөндеу жұмыстарынан кейін жабдықтардың тозуы екі есеге азайды

Энергетика • Кеше

Биыл музейге 822 мыңнан астам адам барған

Музей • Кеше

Сезініп көруге болатын фотокөрме: Алматылықтар «су астындағы өмірді» тамашалады

Алматы • Кеше

«NBC TV» қаржы пирамидасына қатысты қылмыстық іс сотқа жолданды

Оқиға • Кеше

Президент бірқатар заңға қол қойды

Президент • Кеше

Азия чемпионаты: 8 боксшымыз финалда бақ сынайды

Бокс • Кеше

Елімізде мұғалімдердің табысы 4,1%-ға төмендеген

Білім • Кеше

Барлық жаңалықтар