Тоқаев билік транзиті туралы әңгімелерге жауап берді

Мемлекет басшысы жаңа Конституция жобасына қатысты референдумда дауыс бергеннен кейін журналистерге арналған брифинг өткізді.

Қоғамда және сарапшылар ортасында конституциялық өзгерістер болашақ билік транзитіне және президент сайлауына дайындықпен байланысты деген болжамдар айтылуда. Қасым-Жомарт Тоқаев мұндай әңгімелерден хабардар екенін, бірақ алаңдауға негіз жоқ екенін атап өтті, деп хабарлайды Arasha.kz.

«Вице-президент лауазымы төңірегінде түрлі әңгімелер жүріп жатқанынан хабардармын. Расында да, бірқатар шет елдерде мұндай лауазым бар. Кейбір сарапшылар Қазақстанда билік үшін бәсекелестік күшейіп, алаңдаушылық туғызатын түрлі үрдістер белең алып жатыр деп есептейді. Алайда, бұл қоғамға кері әсерін тигізеді деп қауіптенуге ешқандай негіз жоқ.

Вице-президент лауазымының енгізілуі мемлекеттік билік институттарын нығайтады, бұған болашақта көз жеткізуге болады. Мен Президент ретінде бұл лауазымға да, жалпы реформаларға да үлкен үміт артамын. Ал келесі президент сайлауы, тиісті түрде, қолданыстағы Конституцияда белгіленген мерзімде – 2029 жылы өтеді»,  - деді президент.

Сондай-ақ, ол жаңа Конституцияны дайындау мен талқылауға салыстырмалы түрде қысқа уақыт кетті деген ескертулерге жауап берді. Оның айтуынша, құжат бойынша жұмыс әлдеқайда ұзақ жүргізілген. Президент Конституцияға өзгерістер 2022 жылы енгізілгенін және сол кезде-ақ жаңа Ата заң қабылдау мүмкіндігі қарастырылғанын, бірақ шешім кейінге қалдырылғанын еске салды. Ол жаңа Конституция идеясымен шамамен екі жыл бұрын айналыса бастағанын, өйткені елге жаңартылған құжат қажет деп санағанын атап өтті.