Мемлекеттік бюджет кірісі бір жылда 16 пайызға көбейді

Бес айдың қорытындысы бойынша, бюджетке 11,4 триллион теңгеден астам қаражат түсіп, бұл өткен жылдың сәйкес кезеңімен салыстырғанда 16 пайызға жоғары болды, – деп хабарлайды Aikyn.kz сайты.

Аталған көрсеткіш экономикалық белсенділіктің тұрақты өсімін және бюджет түсімдерінің артуын көрсетеді.

Республикалық бюджеттің кірісі 100,9 пайызға орындалды. Жоспар бойынша 7,34 триллион теңге түседі деп күтілсе, нақты түсім көлемі 7,41 триллион теңгені құрады. Осылайша, жоспарланған межеден 66,7 миллиард теңгеге артық қаражат жиналды.

Өткен жылдың сәйкес кезеңімен салыстырғанда республикалық бюджет кірісі 25,1 пайызға немесе 1,48 триллион теңгеге өсті.

Жедел деректерге сәйкес, жергілікті бюджеттердің кірісі 4,05 триллион теңгеге жетті. Бұл өткен жылдың қаңтар-мамыр айларымен салыстырғанда 95,1 миллиард теңгеге немесе 2,4 пайызға көп.

Республикалық бюджет кірісінің құрылымында трансферттерді есептемегенде, түсімдердің 97,7 пайызы салықтар есебінен қалыптасты. Салық түсімдері бойынша жоспар 100,5 пайызға орындалып, өсім көлемі 30,6 пайызды құрады.

Айтарлықтай өсім қосылған құн салығы, корпоративтік табыс салығы, пайдалы қазбаларды өндіру салығы және шикі мұнай экспортына салынатын кедендік баж түсімдері есебінен қамтамасыз етілді. Бұған әлемдік шикізат нарығындағы қолайлы баға жағдайы, экономиканың өсуі, іскерлік белсенділіктің артуы және салықтық реформалар оң әсер етті.

Мемлекеттік бюджет даму бюджеті мәртебесін сақтап отыр. Қаражаттың басым бөлігі ұзақмерзімді экономикалық өсімді қамтамасыз етуге және азаматтардың өмір сүру сапасын жақсартуға бағытталған инфрақұрылымдық жобаларды жүзеге асыруға жұмсалуда.

Басым бағыттардың қатарында автомобиль жолдарын салу және жаңғырту, инженерлік және коммуналдық инфрақұрылымды дамыту, көлік-логистикалық дәліздерді кеңейту, энергетика, сумен жабдықтау және цифрландыру салаларындағы жобаларды іске асыру бар.

Бұл бастамалар өңірлер арасындағы байланысты нығайтып, халықтың сапалы қызметтерге қолжетімділігін арттыруға, жаңа жұмыс орындарын ашуға және қосымша жеке инвестициялар тартуға мүмкіндік береді.

Жалпы алғанда, бес айдың қорытындысы бюджеттің кіріс базасының тұрақтылығын, экономикалық белсенділіктің өсуін және даму бюджетінің сақталуы жағдайында түсімдердің оң динамикасын көрсетіп отыр.