“Мемлекеттік маңызы бар міндет“ Тоқаев жаңа мектептердің құрылысы туралы

Қазақстанның барлық өңірінде, ең алдымен мектептегі орын тапшылығы сақталып отырған аудандарда сапалы білім беру мекемелерінің құрылысы жалғасады. Президент Қасым-Жомарт Тоқаев мұны мемлекеттік маңызы бар өзекті міндет деп атады, - деп хабарлайды Tengrinews.kz Ақордаға сілтеме жасап.

Астанада өткен Тамыз конференциясында Мемлекет басшысы ұлтымыздың келешегін айқындайтын тарихи өзгерістер табысты болуы үшін, ең алдымен, қоғамдық сана жаңғыруға тиіс екенін айтты. Бұл істе мәртебелі мамандық иесі – мұғалімнің рөлі айрықша маңызды.

"Әлемді ең дамыған технология өзгертуі мүмкін. Ал адамды, оның дүниетанымын өзгерту – нағыз ұстаздың ғана қолынан келетін іс. Сондықтан мемлекет білім жүйесін дамытуға әрдайым баса назар аударады", - деді Президент.

Президенттің сөзінше, соңғы жеті жылда бұл салаға бөлінетін қаржы үш есе артып, 6,4 триллион теңгеге жеткен. Кейінгі бес жылдың ішінде 1 миллионнан астам оқушыға арналған 1120 мектеп салынды. 5 мыңнан астам ауыл мектебінің материалдық-техникалық қоры жаңартылды. Білім ошақтарында 7 мыңнан астам заманауи үлгідегі пән кабинеттері жасақталды.

"Өздеріңізге мәлім, осыдан екі жыл бұрын менің тікелей тапсырмаммен "Келешек мектептері" жобасы бастау алды. Осы жоба аясында 460 мың оқушыға арналған 217 мектеп салынды. Заманауи мектептердің жаңа стандарты пайда болды десек, артық болмайды. Алайда, біз әрбір өңірде, соның ішінде мектептерге сұраныс бар аудандарда сапалы оқу орындарының құрылысын міндетті түрде жалғастырамыз. Бұл – алдымызда тұрған мемлекеттік маңызға ие аса өзекті міндет. Уақытты созбай жұмысқа кірісуіміз керек, келесі жылы құрылыс барысы қарқынды болуы қажет", - деді Мемлекет басшысы.

Тағы оқыңыз: Ұстазды ұлықтаған елдің келешегі жарқын болары айдан анық - Тоқаев

Google News арқылы жаңалықтарымызды қадағалаңыз