Михаил Шайдоровтың олимпиадалық образы қалай дүниеге келді дизайнер

Шығармашылық серіктестіктің бастауы

Дизайнер мен спортшының ортақ жолы 2025 жылдың жазында басталған. Михаилдың мұздағы шеберлігіне тәнті болған Сәкен Жақсыбаев оған бірлесіп жұмыс істеуге ұсыныс тастайды.

— Михаилдың болашағы зор екенін бірден аңғардым. Оның талантына деген құрметімнің белгісі ретінде сахналық бейнесін жасап беру туралы өзіне хат жаздым, — дейді дизайнер.

Олардың алғашқы жобасы Алматыда өткен Денис Тенді еске алу турнирінен басталды. Ол кезде спортшы үшін алтын жіппен зерленген қысқа шапан әзірленген болатын. Дәл осы сәттен бастап спортшы мен дизайнерлік топтың жүйелі серіктестігіне жол ашылды.

Костюмнің мәні мен мазмұны

Бастапқыда халықаралық жарыстарға арналған киім кейінірек Олимпиада талаптарына сай толықтырылып, жетілдірілді. Костюм қойылымның ішкі мазмұнын ашып, музыкалық екпінді күшейтіп және ұлттық рухты паш ету үшін жасалған.

Дизайнердің айтуынша, костюмнің түстер гаммасы аспан түстес көгілдір түстен қара түске ауысатын ғарыштық концепцияға негізделген. Ал Swarovski тастары мен арнайы жарық эффектілері мұздағы қимылға ерекше көрік қосқан.

— Мәнерлеп сырғанауда костюм — қойылымның ажырамас бөлігі. Ол қимылға кедергі келтірмей, керісінше, сезімді еселеп, көрерменге батылдық пен әсемдіктің тепе-теңдігін көрсетуі тиіс, — деп атап өтті Сәкен Жақсыбаев.

Қолөнершілердің қажырлы еңбегі

Олимпиадалық киімді дайындауға 2,5 ай уақыт кеткен және барлық жұмыс техниканың көмегімен емес толығымен қолмен тігіліп, әзірленген. Әр детальға жеке шебер жауап берді: бірі кесте тіксе, екіншісі матаны бояумен айналысқан. Ал тастармен безендіру жұмысын біртұтас стильді сақтау үшін тек бір маман ғана жасап шыққан.

Бұл процесте дизайнерлік амбиция емес, спортшының жайлылығы алдыңғы орынға қойылды.

— Біз үшін ең маңыздысы — Михаилдың өзін еркін сезінуі. Ол костюмді тігу барысында кәсіби кеңестерін беріп, оның мұздағы техникалық талаптары мен ішкі түйсігін ескере отырып жасалды, — дейді автор.

Сонымен қатар Михаил Шайдоровтың костюмін Vogue Italia журналы жоғары бағалаған еді.

Еске сала кетейік, Михаил Шайдоров араға 32 жыл салып, ел қоржынына қысқы Олимпиада ойындарының кезекті алтын жүлдесін сыйлады.