Микроқаржы ұйымдары мен коллекторларға 693 млн теңге айыппұл салынды​

2023 жылдан бері Қазақстанда 99 микроқаржы ұйымының лицензиясы қайтарып алынса, тағы 29 МҚҰ-ның лицензиясы тоқтатылды. Сондай-ақ тізілімнен 47 коллекторлық агенттік шығарылды.

Қаржы нарығын реттеу және дамыту агенттігінің хабарлауынша, осы уақыт ішінде реттеуші 824 тексеру жүргізіп, жалпы сомасы 693,4 млн теңгеге 2 010 әкімшілік айыппұл салды.

Ең жиі кездесетін заңбұзушылықтардың қатарында — борыш жүктемесіне тиісті баға бермей микрокредит беру, шекті мөлшерлемені асыра пайдалану, заңнамалық шектеулердің болуына қарамастан азаматтарға несие беру, несие бюроларына бұрмаланған мәліметтерді беру және борышкерлермен өзара іс-қимыл жасау қағидаларын бұзу бар.

Қазақстанда сондай-ақ «жалақыға дейінгі» микрокредиттерді беру қағидалары өзгертілді. Енді олар бойынша мөлшерлеме бұрынғы күніне 1%-дың орнына күніне 0,3%-дан және жылдық 179%-дан аспауы тиіс. Кепілсіз қарыздарды бес жылдан астам мерзімге беруге тыйым салынды, ал қашықтан берілетін микрокредиттер үшін 24 сағаттық салқындату кезеңі енгізілді.

2027 жылғы 1 мамырға дейін жеке тұлғалардың берешектерін коллекторларға сатуға салынған мораторий ұзартылды. Коллекторлық агенттіктердің қызметкерлері үшін өкілеттіктерін асыра пайдаланғаны және теріс пайдаланғаны үшін жеке әкімшілік және қылмыстық жауапкершілік енгізілді.

2025 жылдың қорытындысы бойынша МҚҰ мен коллекторлар 33,9 мың қарыз алушының негізгі борышын, пайыздық мөлшерлемелерін, айыппұлдары мен өсімдеулерін толық немесе жартылай есептен шығарды. Тағы 722 мың азаматтың берешегі қайта құрылымдалды (реструктуризацияланды).

2026 жылғы 1 маусымдағы жағдай бойынша Қазақстанда 211 микроқаржы ұйымы және 205 коллекторлық агенттік жұмыс істеп тұр.

Бүгін, 10:32