Министр Ақкенженов декларацияда көрсеткен табысын жариялады

АСТАНА, 28 қаңтар – Sputnik. Энергетика министрі Ерлан Ақкенженов декларацияда көрсеткен табысын жариялады, деп хабарлайды Sputnik Қазақстан тілшісі.

Мәжілісте өткен брифингте журналистер министрдің табыс декларациясы жайында сұрады. Ақкенженов ол есепті тапсырғанын мәлімдеді.

"Өткен жылда жалақы менің жалғыз табыс көзім болды. Қосымша табысым жоқ. Ал менің бір айлық жалақым шамамен 1,2 млн теңгені құрайды. Иә, сыйақылар да бар", - деді Ақкенженов.

Сыйақыларымның барлығын қоса есептегенде декларацияда көрсетілген табысым 20 млн теңгеден сәл асады, деді министр.

Айта кетері, бұған дейін Ақорда кейбір қызметкерлер мен олардың жұбайларының декларациялары туралы мәліметтерді жариялаған болатын.

Олардың ішінде Алматының бұрынғы әкімі де бар. Досаевтың әйелі 2024 жылы 2,3 млрд теңге табыс тапқан.