Мишлен жұлдызды аспаздар қазақ асханасына тәнті болды

Жұлдызды аспаздар Қазақстанға алғаш рет келіп, ұлттық тағамдарға үлкен қызығушылық танытты. Олар Алматыға келген алғашқы күндерінен-ақ лағман, қазы, бауырсақ, пельмень және жылқы етінен жасалған басқа да тағамдарды татып көрді.

– Қазақстанға сапар алдында ел туралы көп естігенбіз, оның аумағы бойынша әлемде тоғызыншы орында екенін де білдік. Бірақ қазақ асханасымен тек Алматыға келген соң ғана таныстық. Біз бауырсақ пен қазының дәміне ерекше риза болдық, – деді Фабио Тоффолон.

Йошико Сатоның айтуынша, Швейцарияда сиыр етінен қазыға ұқсас тағам дайындалғанымен, жылқы етінің дәмі әлдеқайда ерекше әрі бай.

Аспаздар Алматыдағы Жасыл базарда болып, жергілікті өнімдер мен дәмдеуіштердің сапасын жоғары бағалады. Олардың пікірінше, бұл ингредиенттер Мишлен деңгейіндегі ас мәзіріне лайықты.

Доминик Сато атап өткендей, Мишлен жұлдызына қол жеткізудің нақты ережелері жоқ, бірақ негізгі талаптар айқын: аспаздың кәсібилігі, сапалы өнім, маусымдық ингредиенттерді қолдану, креатив пен тепе-теңдік.

– Мишлен жұлдызын алу үшін бастысы – балансты сақтау мен өнімнің балғындығы. Бұрын тек француз тағамдары бағаланатын, қазір кез келген ұлттық асхана жоғары марапатқа лайық бола алады. Біз Мишлен инспекторларының Қазақстанға да келетін уақыты жақын деп сенеміз. Сапалы өнімдеріңіз бар, сондықтан бұл бағытта мүмкіндік зор, – деді Доминик Сато.

Йошико Сато қазақстандық аспаздарға Жапония тәжірибесін үлгі етті.

– Біздің елде шеф-аспаздар алдымен Еуропада тәжірибе жинап, кейін өз елінде сапаны арттырды. Сол жолмен жүрген соң Мишлен сарапшылары Жапонияға келе бастады. Қазақстан да осындай жолмен дами алады, – деді ол.

Фабио Тоффолонның пікірінше, жұлдыз алу үшін тек кәсіби шеберлік емес, мотивация мен ізденіс те маңызды.

– Кейбір шефтер өзін «жұлдыз» санайды, бірақ жаңа нәрсені үйренуге ынтасы жоқ. Бұл – үлкен қателік. Білім аз болса да, үйренуге деген құштарлық болғаны жақсы. Біз жұмысқа қабылдағанда кәсібилікпен қатар адамның ішкі мотивациясына да мән береміз, – деді ол.

Доминик Сато студенттерге өткізген шеберлік сабағында армандар мен мақсаттың маңызын ерекше атап өтті.

– Арман мен мақсат – кез келген жұмыстың қозғаушы күші. Егер мақсат қойсаңыз, міндетті түрде жетесіз, – деді ол.

Жұлдызды аспаздар өздерінің аспаздыққа қызығушылығын балалық шақтағы естеліктермен байланыстырды. Айтуларынша, дәмді тағамға деген сүйіспеншілікті оларға аталары сіңірген, ол қарапайым өнімдерден ерекше дәмді ас әзірлей білген.

Сапар соңында қонақтар Алматының ерекше дәмін атап өтіп, елден ең алдымен лағманның дәмін есінде сақтап кететіндерін айтты.

Еске салайық, бұған дейін аспаз сұранысқа те мамандық екенін жазған болатынбыз.