Мойындаймыз, баға ақталуға себеп емес ҚазАвтоЖол нашар жолдар туралы

"ҚазАвтоЖол" Қазақстанның ақылы жолдарында қозғалыс қауіпсіздігіне әсер ететін ақаулар барын мойындады. Компания мәліметінше, тек 2026 жылдың өзінде мұндай кемшіліктер 14 ақылы учаскеде анықталған, деп хабарлайды Tengri Auto.

Жөндеу жұмыстары жүргізіліп жатқан кезеңде мұндай учаскелерде жол ақысы алынбайды. Ақау жойылғаннан кейін жол қайта тексеріліп, содан кейін ғана ақылы жүйеге қайтарылады. Жүргізушілер үшін қайта есептеу ешқандай өтінішсіз, автоматты түрде жүзеге асырылады.

"ҚазАвтоЖол" ҰК" АҚ жекелеген учаскелердің жай-күйіне қатысты жүргізушілер тарапынан айтылатын сын-ескертпелердің орынды екенін атап өтеді. Жолдағы шұңқырлар, ойықтар мен өзге де зақымдарды тарифтің төмендігімен ақтауға болмайды. Егер анықталған ақаулар көлік қозғалысының қауіпсіздігі мен үздіксіздігіне әсер етсе, тиісті жол бөлігі кемшіліктер толық жойылғанға дейін ақылы шақырым есебінен алынып тасталады", - деп хабарлады компания.

Ең арзан жол ақысы

Сонымен қатар компания Қазақстандағы ақылы көлік жолдарының құны шетелдік ұқсас жүйелермен салыстырғанда ең төмен көрсеткіштердің бірі екенін атап өтті.

Жеңіл автокөлік үшін 100 шақырым жолдың орташа құны алдын ала төлем жасаған жағдайда шамамен 207 теңге болады. Компания мәліметінше, бұл Ресей, Түркия, Қытай, Франция және Жапониядағы ұқсас ақылы жолдармен салыстырғанда 15–40 есе арзан.

Жеңіл автокөлік үшін 100 шақырым жолдың құны:

Қазақстан - 207 теңгеге жуық; Қытай - 3,2-ден 4,2 мың теңгеге дейін; Түркия - 3,4 мың теңгеге жуық; Ресей - 4,4 мың теңгеге жуық; Франция - 7,1 мың теңгеге жуық; Жапония - 8,4 мың теңгеге жуық.

Сондай-ақ компания ақылы жолдар құнын уәкілетті мемлекеттік орган бекітетінін еске салды. Жиналған қаражат жолдарды жөндеу мен күтіп ұстауға, таңбаларды, жол белгілері мен қоршауларды жаңартуға, жолдарды қысқы тазалауға, төлем жүйесі жұмысына және қозғалыс қауіпсіздігін қамтамасыз етуге жұмсалады.

Жаңа ақылы жолдар

Еске сала кетейік, 10 шілдеден бастап мына учаскелерде ақылы жүйе енгізілді:

Қарағанды – Балқаш – Бұрылбайтал, Бұрылбайтал – Күрті және Талдықорған – Өскемен.

Айта кетерлігі, осы учаскелерге жақын маңда тұратын және балама айналма жолы жоқ жүргізушілер абонемент сатып ала алады.

Абонементті қалай ресімдеуге болады?

1403 байланыс орталығы арқылы:

автокөлік шотын абонемент сомасына толтырып, қызметті қосу үшін байланыс орталығына хабарласыңыз.

kaztoll.kz сайты арқылы:

kaztoll.kz сайтында тіркеліңіз; көлік құралыңызды қосыңыз; "Абонементті рәсімдеу" бөлімін және абонементтің қажетті түрін (айлық немесе жылдық) таңдаңыз.

Ақы алу пункттерінде немесе клиенттерге қызмет көрсету орталықтарында:

ақы алу пунктіндегі немесе қызмет көрсету орталығындағы операторға жүгініңіз; абонемент ақысын ыңғайлы тәсілмен (карта, қолма-қол ақша немесе интернет-банкинг) төлеңіз.

Google News арқылы жаңалықтарымызды қадағалаңыз

Жазылу