Наташа Қалымбетова 32 жыл бұрынғы оқиға бойынша істің әділ тергелуін талап етті

32 жыл бұрын бірнеше ер адамның зорлық-зомбылығына ұшырағанын мәлімдеген Наташа Қалымбетова Қазақстан Президентіне үндеу жасап, істі жеке бақылауына алуды сұрады, – деп хабарлайды Aikyn.kz сайты.

Оның айтуынша, осыдан төрт ай бұрын басынан өткен жағдайды көпшілікке ашық баяндаған. Осыдан кейін құқық қорғау органдары оны Қазақстанға шақырып, арызын қабылдаған. Бірақ іс ресми тіркелгенімен, тергеу барысында айтарлықтай нәтиже болмағанын жеткізді.

«Куәгерлер мен нақты дәлелдердің жоқтығын алға тартып, іс әлі күнге дейін бір орнынан қозғалмай тұр. Мендегі жалғыз дәлел – сол оқиғадан кейін 1995 жылы дүниеге келген қызым. Болжам бойынша, ол қазір Америка Құрама Штаттарында тұрады», – дейді Наташа Қалымбетова.

Әйел Мемлекет басшысынан істің әділ әрі жан-жақты тергелуіне ықпал етіп, оны жеке бақылауына алуды өтінді.

Оның сөзінше, үндеудің мақсаты – тек өз басынан өткен оқиғаның ақ-қарасын анықтау емес, сонымен қатар Қазақстандағы әйелдерге қатысты зорлық-зомбылық мәселесіне қоғам назарын аудару.

«Мен бұл қасіретті 32 жыл бұрын бастан өткердім. Содан бері қызымның қайда екенін білмей өмір сүріп келемін. Бұл істің соңына дейін жеткенін қалаймын», – деді ол.