Наурыз ипотекалық бағдарламасы: қараша айында жаңа өтінімдерді қабылдау басталады

«Наурыз» және «Наурыз жұмыскер» ипотекалық бағдарламалары бойынша несие көлемі 500 миллиард теңгеге дейін ұлғайтылды, – деп хабарлайды Aikyn.kz сайты krisha.kz сайтына сілтеме жасап.

Кеше, 16 қазанда Үкімет тұрғын үй несиелендіруді қолдау шараларын бекітті.

Халыққа арналған жеңілдетілген ипотека көлемі екі есе артады

Бағдарламалар қараша айында іске қосылады. Несие беру де сол айда басталмақ.

«Қазір тетіктері пысықталып жатыр. Жаңа өтінім қабылдау конкурсын қайта іске қосамыз ба, әлде наурыз айында өтінім берген, бірақ іріктеуден өтпеген азаматтарға береміз бе – соны талқылап жатырмыз», – деді «Отбасы банк» басқарма төрайымы Ләззат Ибрагимова.

Банк өкілдерінің айтуынша, қатысу шарттары кейінірек нақты жарияланады.

Пәтер бағасы үш жылға бекітіледі

Маңызды жаңалықтардың бірі – құрылыс компанияларымен жасалатын оффтейк-келісімдер.

«Құрылыс компаниялары «Отбасы банкпен» келісімге отырып, алдағы үш жылда салынып жатқан тұрғын үйлердің бағасын бекітіп қоюға міндеттеледі», – деп түсіндірді Ибрагимова.

Бағдарлама қатысушылары өздеріне ұнаған тұрғын үйді «Баспана маркет» платформасынан таңдай алады.

Еске сала кетейік

«Наурыз» және «Наурыз жұмыскер» бағдарламалары аясында сатып алуға болады:

Астана, Алматы және облыс орталықтарында – тек алғашқы нарықтағы пәтерлерді (яғни, құрылыс компаниясынан тікелей).

Басқа өңірлерде – кез келген тұрғын үйді, соның ішінде қайталама нарықтағы пәтер немесе жеке үйді.

Ипотеканың негізгі шарттары

Мөлшерлеме: әлеуметтік осал топтар үшін – 7%, қалған қатысушыларға – 9%.

Бастапқы жарна:

10% – егер пәтер таза әрлеуде болса;

20% – егер жөндеу жүргізілмеген пәтер болса.

Несие сомасы:

Астана мен Алматыда – 36 миллион теңгеге дейін,

басқа өңірлерде – 30 миллион теңгеге дейін.

Қатысушыларға қойылатын талаптар

Соңғы 5 жылда өз атына тұрғын үй болмауы керек;

«Отбасы банкте» кемінде 2 миллион теңге жинағы бар депозиті болуы қажет.

«Наурыз жұмыскер» бағдарламасына қатысушылар үшін қосымша талап – төмендегі салаларда жұмыс істейтін маман болуы шарт:

өнеркәсіп,

энергетика,

көлік,

ауыл шаруашылығы,

су ресурстары.

Әскери ипотека қайта жанданады

Сонымен қатар, «Отбасы банк» «Әскери баспана» ипотекалық бағдарламасының қайта іске қосылатынын хабарлады.

Бұл бағдарлама шарттары жаңартылып, толық мәлімет 20 қазан, дүйсенбі күні жарияланбақ.