Несие алғаныңызға өкінсеңіз, 14 күн ішінде одан бас тарта аласыз

Қазақстанда несие рәсімдеген азаматтарға оны айыппұлсыз қайтаруға мүмкіндік беретін жаңа талап күшіне енді, – деп хабарлайды Aikyn.kz сайты. 

12 қазаннан бастап банктер кепілсіз қарыз алған клиенттеріне келісімшарт жасалған күннен бастап 14 күнтізбелік күн ішінде несиеден бас тарту құқығын беруге міндетті.

Қаржы нарығын реттеу және дамыту агенттігінің талаптарына сәйкес, азамат осы мерзімде алған ақшасын қайтарса, банк оған айыппұл немесе тұрақсыздық айыбын есептей алмайды. Бірақ қарызды пайдаланған күндер үшін сыйақы төлеу міндеті сақталады. Мәселен, адам 1 миллион теңге несие алып, оны бес күннен кейін қайтаруға шешім қабылдаса, негізгі қарызды толық өтеп, бес күнге есептелген пайызды төлеуі керек. Яғни жаңа тәртіп қарызды мүлде шығынсыз қайтаруға мүмкіндік бермейді.

Бұл талап мүлік кепілге қойылмай рәсімделген несиелерге қатысты. Олардың қатарына қолма-қол берілетін тұтынушылық қарыздар да кіруі мүмкін. Ал ипотека мен кепілмен қамтамасыз етілген басқа несиелерге аталған 14 күндік ереже қолданылмайды. Қаржы ұйымдары клиенттерге келісімшарт жасалғанға дейін қарыздан бас тарту құқығы туралы ақпарат беруге тиіс.

Жаңа талап әсіресе асығыс шешім қабылдап, кейін қарызын қайтарғысы келетін азаматтар үшін маңызды. Дегенмен 14 күн өткеннен кейін несиені мерзімінен бұрын өтеу тәртібі қолданылады. Сондықтан қарыздан бас тартуды жоспарлаған адам келісімшарт жасалған күнді және есептелген сыйақы мөлшерін нақтылағаны жөн.