Нетаньяху өлді деген хабар тарады: Израиль премьерінің жағдайы қандай?

Израиль премьер-министрінің кеңсесі әлеуметтік желіде тараған Биньямин Нетаньяхудың қаза тапқаны туралы ақпаратты ресми түрде жоққа шығарды. Бұл туралы Түркияның Anadolu агенттігіне берген түсініктемеде айтылып, мұндай мәліметтердің жалған екені және премьер-министрдің жағдайы жақсы екені хабарланған, деп жазады Arasha.kz.

Deccan Chronicle басылымының мәліметінше, Нетаньяхуға қатысты қауесеттер Таяу Шығыстағы жағдайдың ушығуы аясында тарай бастаған. Әсіресе АҚШ пен Израильдің Иранға жасаған соққыларынан кейін әлеуметтік желілерде расталмаған ақпараттар көбейген. Кейбір жазбаларда премьер-министрдің қайтыс болғаны немесе жоғалып кеткені туралы болжамдар айтылған.

Бұл әңгімелер 13 наурыз күні Нетаньяхудың X желісіндегі видеоүндеуінен кейін күшейе түсті. Кейбір қолданушылар видеодағы бір кадрда оның қолында алты саусақ бар сияқты көрінетінін айтып, бейне жасанды интеллект арқылы жасалған болуы мүмкін деген пікір білдірген.

Алайда сарапшылар мұндай көрініс техникалық ақау немесе бейненің сәтсіз түсірілген сәтіне байланысты болуы мүмкін екенін айтады. Яғни бұл жағдай видеоны жасанды интеллект өңдегенін дәлелдемейді.

Бұған дейін Иранның Ислам революциясы сақшылары корпусы Нетаньяхудың тағдыры белгісіз екенін мәлімдеп, оның қаза тапқан болуы немесе елден кетіп қалған болуы мүмкін деген болжам айтқан. Ал Израиль тарапы бұл ақпараттың шындыққа жанаспайтынын мәлімдеді.