Израиль премьерінің ұлы қауіпке байланысты АҚШ тан шұғыл түрде қайтарылды

Израиль премьер-министрі Биньямин Нетаньяхудың үлкен ұлы Яир Нетаньяху өзіне төнген қауіпке байланысты АҚШ-тан Израильге шұғыл түрде қайтарылды, деп хабарлайды Tengrinews.kz.

DW мәліметінше, бұл ақпаратты 29 тамызда Израильдің Жалпы ішкі қауіпсіздік қызметі — ШАБАК растаған.

“Яир Нетаньяхуға шынымен де елеулі қауіп төнді. Қалыптасқан жағдайды бағалау нәтижесінде оны күзет тобымен бірге Израильге шұғыл қайтару туралы шешім қабылданды”, – делінген арнайы қызмет мәлімдемесінде.

ШАБАК премьер-министр Биньямин Нетаньяхудың ұлы Яирдың Флоридадан Израильге тез арада эвакуацияланғаны туралы хабарлардан кейін оған Иран тарапынан қауіп төнгенін растады. https://t.co/SJap1MdfOM

— The Jerusalem Post (@Jerusalem_Post) 29 тамыз, 2026 жыл

ШАБАК Яир Нетаньяхудың Флоридадан Израильге жедел эвакуацияланғанын растағанымен, қауіптің нақты неден туындағанын ашып айтпады. Сондай-ақ арнайы қызмет Иранның Израиль премьер-министрінің ұлдарының біріне қастандық жасауды жоспарлағаны туралы ақпаратқа да түсініктеме бермеген.

Америкалық Newsmax басылымының АҚШ құқық қорғау органдарындағы дереккөзіне сүйенген мәліметіне қарағанда, Израиль барлау қызметі 2025 жылдың соңында Яир Нетаньяхуға Флоридада қастандық жасау жоспарын анықтап, бұл туралы АҚШ билігіне хабарлаған.

Басылым деректеріне сүйенсек, ирандық агенттер Майамиде болып, Яир Нетаньяхудың тұрғылықты жері мен жүріп-тұру бағытын бақылаған болуы мүмкін.

Осыдан кейін үнемі израильдік күзет қызметінің бақылауында жүретін Яир Нетаньяхуға тұрған жерінен дереу кету тапсырылған. Ол жеке заттарын да алмай, Израильге оралған. Қазір сонда тұрып жатқаны хабарланды.

Бұдан бөлек, Иранның Ұлттық қауіпсіздік жоғары кеңесінің хатшысы Мохсен Резайи Израиль премьер-министрі Биньямин Нетаньяхуға қатысты қатаң мәлімдеме жасаған.

Бұған дейін БАҚ Иран тарапынан қастандық жасалу қаупіне байланысты АҚШ президенті Дональд Трамптың Түркияда өткен НАТО саммиті кезінде қауіпсіздік мақсатында құпия түрде әскери ұшаққа жеткізілгені туралы жазған еді.

Google News арқылы жаңалықтарымызды қадағалаңыз