Nissan 4 жылдан кейін Қазақстанда қайта сатыла бастайды

Nissan 4 жылдық үзілістен кейін Қазақстанда қайтадан ресми түрде сатыла бастады. Бұл туралы жапондық брендтің ресми дилері Orbis Auto хабарлады.

Қазақстандықтар алғашқы болып Nissan Qashqai және жетінші буындағы Nissan Patrol-ды ала-алады. Біріншісі үш нұсқада ұсынылған: S, SV және SL. Бөлшек бағасы 20 400 000 теңгеден басталады. Екіншісі, төрт жиынтықта ұсынылады: T1, T2, Titanium Plus және Platinum City және  бағасы 54 900 000 теңгеден басталады.

Nissan Qashqai-ға қазақстандық нарықта өзінің санаттастары, кәрістік Kia Sportage және Hyundai Tucson-мен бәсекелесуге тура келеді. Аталған екі көліктің бағасы жағынан төмен, жабдықталуы ұқсас екенін әрі бұлардың қазақстандық нарықта берік орныққанын ескерсек, Nissan Qashqai-ға біраз күш салуға тура келеді. Әрі бұл санатта соңғы жылдары қытайлық сұр көліктер де, ресми сатылатын брендтер де сұранысқа ие.

Кезінде Toyota Land Cruiser, Prado-ларға бәсекелес болған Nissan Patrol –дың жетінші буынында V8 жоқ. Оның орнын 3,5-литрлік қос турболық V6 моторы басқан. Сырты дизайны бұрынғы далалық, жыртқыш келбетінен айырылып, нағыз қалалық үлкен кроссоверге айналғандай көрініс беретін Patrol Toyota Land Cruiser 300 Toyota Land Cruiser 300 -ге бәсекелес болатын сыңайлы. Рамалық ірі көліктер нарығына айтарлықтай бәсеке жоғын ескерсек, Patrol-дың нарықтан өз орнын алуға мүмкіндігі мол.

Ресми дилердің хабарлауынша Қазақстандағы Nissan-ның модельдік қатары жыл соңына дейін төрт модельге дейін ұлғаяды. Келесі кезеңде нарыққа Nissan Pathfinder пен Nissan X-Trail шығару жоспарланған, олардың сатылымы күзде басталады деп күтілуде.

Автоәуесқойлар соңғы жылдары шыққан Nissan көліктерінің қатарында Nissan Pathfinder көбірек қызықтырады. АҚШ-тағы ең базалық жиынтығының бағасы 37,500 доллардан немесе 18 527 667 теңгеден басталатын Pathfinder-дің бағасы, шанағының көлемі әрі дәл осы санатта бәсекелесінің аздығы жағынан сұранысқа ие етуі мүмкін. Ал Nissan X-Trail 2020 жылға дейін қолданыстағы көліктер нарығында жиі кездесетін әрі тұтынушылардың ерекше махаббатына ие болған жоқ.

Айта кетейік, 2022 жылғы оқиғалар мен Ресейге қарсы санкциялар енгізілгеннен кейін Nissan-ды жеткізу іс жүзінде тоқтап қалды. Қазақстандағы Nissan және Infiniti дилерлері мәскеулік кеңсеге тәуелді болды, ал олар өз кезегінде тұрақты жеткізілімдерді қамтамасыз ете алмады. 2023 жылы Orbis Auto мен Nissan Middle East FZE арасында келісімге қол қойылып, Дубай арқылы жеткізу жолдары қарастырылған. Іс жүзінде бұл келісім биыл ғана жүзеге аса бастады.

Әзірше Nissan –ды тек Алматы және Астанада орналасқан екі дилерлік орталықта ғана алуға болады. Компания алдағы уақытта бұлардың саны ұлғаятынын хабарлап отыр.