Өлі орталық оянды Күнде Жерге қауіп төндіретін күшті жарылыстар тіркелді

Күнде түн ортасынан бастап белсенділіктің күрт әрі күтпеген жерден артқаны тіркелді, деп хабарлайды Tengri Life.

Күн астрономиясы зертханасының мәліметінше, белсенділіктің артуы №4513 ірі орталығының кенет қайта жандануымен байланысты. Бұл күн дақтары тобы бір аптаға жуық уақыт бойы бақыланып жатқанымен, кейінгі күндері шектеулі белсенділік қана танытқан болатын.

Мамандар бұл орталықтың энергия қоры таусылуға жақын және бұдан былай айтарлықтай белсенділік көрсетпейді деп болжаған еді. Алайда бірнеше қуатты жарқыл ғалымдардың бастапқы тұжырымын жоққа шығарды.

№4513 белсенді орталығының орналасуы ерекше маңызға ие: қазір ол Күн дискісінің көрінетін бөлігінің дәл ортасында тұр. Сондықтан, плазманың Жерге бағытталған шығарылымы болса, оның біздің планетаға тікелей әсер ету ықтималдығы жоғары.

Күн басталғалы бері ғалымдар М деңгейіндегі (қабылданған 5 балдық шкала бойынша 4-санат) үш күшті жарқылды тіркеді. Оқиғалардың қарқындылығы M1.7-ден M1.9-ға дейінгі аралықта болды. Салыстырмалы түрде: тамызда бүгінгі күнге дейін мұндай төрт қана жарқыл тіркелген болатын. Осылайша, небәрі бірнеше сағат ішінде олардың саны екі есеге жуық артты.

Біраз уақыттан кейін Күнде бұдан да қуатты жарқыл болды - М7.0 деңгейіндегі жарқыл тіркеліп, ол қазіргі белсенділік толқынындағы ең күштісі болды. Қолда бар мәліметтерге сәйкес, бұл оқиға ғарышқа плазманың шығарылуымен ұласты.

"Шамасы, плазма бұлтының шеті болса да Жерге тиеді, дегенмен негізгі лек планетаны айналып өтуі де мүмкін", - деп атап өтті Күн астрономиясы зертханасының мамандары.

Қазіргі уақытта ең жоғары санаттағы (X класы) жарқылдар тіркелген жоқ, сондықтан тарихи рекорд туралы айтуға әлі ерте. Бұл ретте мамандар қазіргі белсенділік толқыны, ең алдымен, кейінгі екі-үш айдың ауқымында ғана байқалатынын айтты. Ұзақ мерзімді перспективадағы рекорд белсенділік туралы әзірге сөз болып отырған жоқ.

Соған қарамастан, Жер үшін қауіп-қатер қазіргі уақытта кейінгі кезеңдегі ең жоғары деңгейлердің бірі ретінде бағаланып отыр. Алдын ала болжам бойынша, егер шығарылған плазма планетаға тиетін болса, геомагниттік салдар G3 деңгейінен (5 балдық шкала бойынша үшінші деңгейдегі қуатты дауыл) аспауы тиіс. Егер плазма Жерге расында жетсе, бұл кейінгі 1–2 айдағы ең қуатты магниттік дауыл болуы мүмкін.

Қазіргі сәтте нақты математикалық модельдер мен егжей-тегжейлі болжам әлі жоқ - Астана уақытымен сағат 15:02-де болған ең жоғары деңгейдегі жарқылдан бері салыстырмалы түрде аз уақыт өтті және мәліметтерді өңдеу әлі жалғасып жатыр.

Оқиғалардың бұдан арғы дамуы қазіргі белсенділіктің қысқа мерзімді эпизод болып қалуына немесе үдеуіне байланысты болмақ. Ғалымдар үшін басты жұмбақ - келесі жарқылдың болу ықтималдығы және оның ең жоғары X санаты шегінен аса алу-алмауында болып отыр.

Google News арқылы жаңалықтарымызды қадағалаңыз