Өмір бойғы зейнетақы немесе инвестициялық табыс қазақстандықтарға не ұсынылады

Бүгінде қазақстандықтарға өмір бойы сақтандыру төлемдерін алуды қамтамасыз ететін жедел, кейінге қалдырылған және бірлескен (ерлі-зайыптының) зейнетақы аннуитеттері қолжетімді. Алдағы уақытта азаматтарға зейнетақы шешімдерінің кеңейтілген таңдауын ұсыну жоспарланып отыр, деп хабарлайды Tengrinews.kz Қаржы нарығын реттеу және дамыту агенттігіне (ҚНРДА) сілтеме жасап.

Жинақтаушы сақтандыру өнімдері желісін кеңейту туралы бастама сақтандыру нарығын 2030 жылға дейін дамыту бағдарламасы жобасында қамтылған. Құжатты Мемлекет басшысының тапсырмасы бойынша ҚНРДА нарық қатысушылары және сарапшылар қауымдастығымен бірлесіп әзірледі.

Анықтама: Зейнетақы аннуитеті - бұл сақтандыру ұйымы адамның жинақтары есебінен оған тұрақты зейнетақы табысын төлейтін, ұзақ өмір сүру тәуекелін өз мойнына алатын және белгіленген мерзім ішінде немесе өмір бойы төлемдерді қамтамасыз ететін сақтандыру шарты.

Негізгі өнім ретінде кепілдендірілген зейнетақы аннуитеті қалады. Ол өмір бойғы төлемдерді қамтамасыз етеді, ал адамның күтілген мерзімнен ұзақ өмір сүруі және зейнетақы төлеуге көбірек қаражат қажет болу тәуекелін сақтандыру ұйымы өз мойнына алады. Қолданыстағы өнім зейнетақы төлемдерін ұлғайтудың (индекстеудің) түрлі нұсқасы есебінен икемді бола түседі.

Сондай-ақ инвестициямен байланысты аннуитет (unit-linked) пайда болады. Ол зейнетақыны қорғауды инвестициялық табыс алу мүмкіндігімен ұштастыруға мүмкіндік береді. Нәтиже таңдалған инвестициялық портфельдің немесе нарықтық индекстің кірістілігіне байланысты болады. Кейін жинақтарды өмір бойғы төлемдері бар кепілдендірілген зейнетақы аннуитетіне аударуға болады.

Тағы бір нұсқа гибридті аннуитет болмақ. Онда қаражат бірден екі бөлікке бөлінеді: бірі кепілдендірілген өмір бойғы төлемдерді қамтамасыз етсе, екіншісі қосымша табыс алу үшін инвестицияланады. Осылайша, азамат бір мезгілде кепілдендірілген зейнетақы алып, инвестициялық табысқа қатыса алады.

"Таңдау жасауды жеңілдету үшін зейнетақыны жоспарлаудың бірыңғай цифрлық сервисін құру жоспарланған. Оның көмегімен азаматтар зейнетақы өнімдерін салыстыра алады, болашақ төлемдердің ықтимал мөлшерін есептеп, қолайлы нұсқаны таңдап, дербес зейнетақы жоспарын ала алады", - деп хабарлады агенттік.

Мұндай жүйе зейнетақы өнімдерін түсінікті әрі қолжетімді етуге, азаматтардың қосымша зейнетақы табысын қалыптастыру мүмкіндіктерін кеңейтуге және олардың ұзақ мерзімді қаржылық жоспарлауға қатысуын арттыруға мүмкіндік береді.

ҚАЗІР ТАЛҚЫЛАНЫП ЖАТЫР

Полиция 1 қыркүйек қарсаңында жүргізушілерге үндеу жасады

Бүгін 10:38 1

Google News арқылы жаңалықтарымызды қадағалаңыз