Оңтүстікте 103 суару каналы автоматтандырылады

Қазақстан Республикасының Су ресурстары және ирригация министрлігі еліміздің оңтүстік өңірлерінде 103 суару каналын автоматтандыру жоспарланып отырғанын мәлімдеді.

Ведомствоның хабарлауынша, қазіргі уақытта Қазақстанның бірқатар аймағында су шаруашылығы нысандарын жаңғырту, ирригациялық жүйелерді реконструкциялау және су үнемдеу технологияларын енгізу бағытында ауқымды жұмыстар жүргізілуде.

Атап айтқанда, Түркістан облысы аумағында ұзындығы 143 шақырымнан асатын ирригациялық желіні қайта жаңғырту жобасы басталған. Министр Нұржан Нұржігітов өңірге жұмыс сапары барысында су шаруашылығы нысандарының жай-күйімен және жүзеге асырылып жатқан жобалардың барысымен танысты.

Сонымен қатар, Астана қаласында Аралды құтқару халықаралық қоры Басқармасының отырысы өтіп, су нысандарының қауіпсіздігі мәселелері қаралды. Министрлік бөгеттер мен су қоймаларының қауіпсіздігін бақылау жұмыстары тұрақты түрде жүргізіліп жатқанын атап өтті.

Өңірлерде де бақылау күшейтілген. Мәселен, Ақмола облысы аумағындағы «Қазсушар» филиалы су шаруашылығы нысандарында тәулік бойы кезекшілік ұйымдастырған. Осындай шаралар Солтүстік Қазақстан облысы аумағындағы Сергеев және Петропавл су қоймаларында да енгізілген.

Министрлік мәліметінше, мемлекеттік қолдау нәтижесінде елде су үнемдеу технологияларын енгізу қарқыны бес есеге артқан.

Бұдан бөлек, Астанада өткен «Мөлдір бұлақ» республикалық экологиялық акциясының қорытындысы шығарылып, студенттер «Суды үнемде – болашақты сақта!» тақырыбында экологиялық сағатқа қатысты.

Сондай-ақ, Еуропалық қайта құру және даму банкі бірлесіп жүзеге асырылып жатқан жоба аясында үнемделген қаражат есебінен қосымша 14 суару каналын бетондау жоспарланып отыр.