Сайлау учаскелеріндегі пандустар автоматтандырылады

Елде мүгедектігі бар азаматтардың құқықтары қамтамасыз етіліп, сайлау учаскелеріндегі процестердің қолжетімділігі артады.

Салаға жаңа технологияларды енгізу арқылы республикада тұрақты инклюзивті орта қалыптастады. Бүгін Орталық сайлау комиссиясы мен Еңбек және халықты әлеуметтік қорғау министрлігі алдағы 5 жылға арналған тиісті жол картасын қабылдады. Құжатта сандық жүйені енгізу мен учаскелердегі пандустардың автоматтандырылуы секілді бірқатар маңызды бағыт қарастырылған. Бұдан бөлек, енді сайлауды ұйымдастырушылар үшін мүмкіндігі шектеулі жандардың қажеттіліктерін қамтитын арнайы курстар өткізу жоспарланды.

Нұрлан Әбдіров, ҚР Орталық сайлау комиссиясының төрағасы:

- Арнайы оқытуларды біз бастап кеттік. Бұны жүйелі түрде қолға алып жатырмыз. Көз көруі немесе жүріп тұру қабілеттері төмен, қиыншылық көріп жүрген адамдарға біз үйге барып дауыс беру жағдайын жасап жатырмыз. Сонымен қатар «жоқ, қайтсемде учаскеге барамын, бұл ерекше саяси сәт, мен оған тікелей өзім барып қатысамын» дегендерге мүмкіндік жасап отырмыз.

Светлана Жақыпова, ҚР Еңбек және халықты әлеуметтік қорғау министрі:

- Ерекше жағдай жасауды талап ететін 200 мыңнан астам азаматымыз бар. Ол негізі есту, көру қабілеттері және тірек-қимыл аппаратына қарамастан бейімдеу, оңалту, негізгі шараларды қарастыратын, талап ететін категориялар бар.

Заман талабына сай, қамкөңіл жандарды қолдау маңызды. Сондықтан мамандар, барлық сайлау учаскесінде, зағип жандарға арналған мәтінді тану бағдарламалық құралын енгізуге ниетті. Сондай-ақ енді сайлау туралы ақпаратты қамтитын Брайль қарпіндегі құжатты әзірлеуге ден қойылады.

Алексей Рогов, ЕҚЫҰ Астанадағы бағдарламалар офисінің басшысы:

- Қазақстандағы мүгедектігі бар азаматтарға жасалған жағдайларды көріп,  көңілім көншіді. Қазір Біріккен Ұлттар ұйымының орнықты даму мақсатына сәйкес, мемлекеттер арасындағы қарама-қайшылықты жою мәселесін қарастырып жатырмыз. Осылайша, «инклюзия» сөзін әмбебап принципіне айналдыру көзделді.