Оралда банк картасын алаяқтарға берген жігіт жауапкершілікке тартылды

8 шілдеде Батыс Қазақстан облысының Орал қалалық соты дропперлікке қатысты қылмыстық іс бойынша айыптау үкімін шығарды.

Іс материалдарына сәйкес, сотталушы ақшалай сыйақы алу мақсатында өз атына банк шотын ашып, оған қол жеткізу мүмкіндігін үшінші тұлғаларға берген. Кейін бұл шотқа алаяқтық жолмен иеленген қаражат аударылып, сотталушының сыйақысы ұсталғаннан кейін қалған ақша қолма-қол ақшаға айналдырылған.

Петропавлда 120 млн теңгені қолды қылған дропперлер сотталды

Сот отырысында айыпталушы өз кінәсін толық мойындады. Мемлекеттік айыптаушы ұсынған дәлелдер негізінде сот оны Қылмыстық кодекстің 232-1-бабының 1-бөлігі бойынша кінәлі деп танып, 78 640 теңге көлемінде айыппұл салды.

Сот үкімі әзірге заңды күшіне енген жоқ.

Құқықтық сауаттылықты арттыру және мұндай құқық бұзушылықтардың алдын алу мақсатында Орал қалалық сотында көрсетілімдік сот процесі ұйымдастырылды. Оған жастар мен жоғары оқу орындарының студенттері қатысты.

Прокуратура азаматтарға банк карталарын, банк шоттарын, электрондық әмияндарын, логиндері мен құпиясөздерін, сондай-ақ өзге де төлем деректемелерін бөгде адамдарға бермеуге кеңес береді.

Қазақстанда дропперлер арқылы 112 млрд теңгеден астам заңсыз операциялар жүргізілген

Ведомство өкілдері «оңай табыс» туралы ұсыныстарға сеніп, өз банк шотын немесе картасын басқа адамдарға пайдалануға берген азаматтардың қылмыстық жауапкершілікке тартылуы мүмкін екенін ескертті.