Астанада алаяққа банк картасын берген бозбала 7 жылға сотталуы мүмкін

АСТАНА, 22 қазан — Sputnik. Дропперлерді қылмыстық жауапкершілікке тартатын заң күшіне енген уақыттан бастап аталған бап бойынша 7 қылмыстық іс тіркелді, деп хабарлады Бас прокуратура.

"Мысалы, Астана қаласында алаяққа Қазақстан Республикасының азаматынан ұрланған ақша қаражатын аудару үшін өзінің банктік шотының деректемелерін берген он жеті жасар бозбалаға қатысты тергеу басталды", - деп жазылған хабарламада.

Алаяқтар уәде еткен сыйақы үшін ол енді жеті жылға дейін бас бостандығынан айырылу мүмкін.

Осындай кері әсер өз банктік шоттарын, соның ішінде өзге елден оларды қылмыстық схемаларда пайдалану үшін ұсынатын шетел азаматтарына да қолданылады.

Дегенмен құқыққа қайшы схемаға тартылған, бірақ бұл туралы уәкілетті органдарға өз еркімен хабарлаған және қылмысты ашуға белсенді ықпал еткен адам қылмыстық жауаптылықтан босатылады.

"Егер сіз бұрын шоттарыңызды үшінші тұлғаларға берген болсаңыз, құқыққа қарсы схемаларға ықтимал тартуды болдырмау үшін дереу банк бөлімшесіне хабарласыңыз немесе онлайн-банкинг арқылы картаны өз бетіңізше бұғаттаңыз", - деп жазылған хабарламада.

Еске сала кетейік, 2025 жылдың 16 шілдесінде мемлекет басшысы Қазақстан Республикасының қылмыстық заңнамасын оңтайландыру мәселелері бойынша заңына қол қойды. Оған сәйкес "дропперлік" – яғни, өзінің банктік карталарын, шоттарын және өзге де төлем құралдарын сыйақы үшін үшінші тұлғаларға беру үшін қылмыстық жауаптылық енгізілді.