Оралдағы аймақтық хабта 15 стартап жоба қолдау тапты

Орал қаласындағы Batys Hub аймақтық орталығы 2023 жылы құрылып, осы уақыт аралығында 15 жоба қолдау тапқан.

Қалааралық жолаушы тасымалы қызметі, шетел тілін меңгеруге арналған онлайн-платформа секілді бірнеше стартап нақты жүзеге асқан. Былтырдан бастап, Batys Hub астаналық цифрлық технопарктің филиалы саналады. Бүгін аталған хабта болған Мәжіліс депутаты Снежанна Имашева технологиялық кәсіпкерлікті дамытудағы Жайық жастарының бастамаларымен танысты. Жаңа жобалардың жасанды зерде мен цифрлық технологияны енгізудегі маңызын атап өтті.

Әсел Қасымова, Batys Hub директоры:

- Ай-ти стартаперлерді қолдаймыз, олардың ай-ти мамандарына білім береміз, әртүрлі онлайн, офлайн бағдарламалар бар. Яғни біз сол технологиялық кәсіпкерлікті нығайтып, инновациялық айти-эко жүйесін құрамыз, қалыптастырамыз, нығайтамыз, дамытамыз. Оларға барлық мүмкіндіктер, қолдау көрсетеміз.

Снежанна Имашева, ҚР Парламенті Мәжілісінің депутаты:

- Президент өзінің сөзінде айтты, осы жылы цифрлық қатынастарға, цифрлық  жобаларға, жалпы цифрлық дамуға үлкен көңіл бөлеміз дегенді. Сондықтан осындай хабтар әрі қарай дамуға талпыныс беретін, үлкен жобалар. Оған қоса Мәжілісте жаңадан Цифрлық кодекс пен Жасанды интеллект туралы заң қабылданды. Сондықтан бұлар да әрі қарай саланы дамытуға одан да үлкен серпін беруге арналған.