Оралдық зейнеткер әйел Доссорға кеткен соң жоғалып кетті

13 қаңтардан бері Орал қаласының 70 жастағы тұрғыны Капиталина Симанькова туыстарымен байланысқа шықпай отыр. Оның Доссор ауылындағы азаматтық күйеуі алғашында отбасына әйелдің қайтыс болғанын айтқан, кейіннен «бәрі жақсы, ол аман‑есен» деп мәлімдеген.

Туыстары Капиталинаның өзімен байланыса алмаған, ол үйіне қайтып оралмаған.

Соңғы рет жиені Елена Рафикова қаңтар айында тәтесімен сөйлескен. Бұған дейін олар күн сайын хабарласып тұрған. Өткен жылдың қазанында азаматтық күйеуі Капиталинаны Доссор ауылына алып кеткен, ол сол жерде бірге тұрған.

18 қаңтардан 19 қаңтарға қараған түні Владимир Малов туыстарына хабарласып, әйелдің қайтыс болғанын айтқан. Осыдан кейін ол қоңырауларға жауап бермей, телефонын өшіріп тастаған. 21 қаңтарда қайта байланысқа шығып, Капиталинаның тірі екенін және «бәрі жақсы» екенін жеткізген. Бірақ туыстарына онымен сөйлесуге мүмкіндік бермеген.

- Бұрын күн сайын сөйлесетінбіз, бәрі жақсы болатын. Қазір мен оның қайда екенін де, қайдан іздеу керегін де білмеймін, – дейді Елена.

6 ақпанда Малов туыстарына өзі вахтаға кеткенін, Капиталинаға күтуші жалдағанын және әйелдің жағдайы жақсы екенін хабарлаған. 18 ақпанда ол Капиталинаны Оралға жібергенін айтқан. Бірақ әйел үйіне қайтып оралмаған.

Туыстарының өтініші бойынша Маловтың қызы Доссордағы үйіне барған. Оның айтуынша, Капиталина ол жерде болмаған.

Елена соңғы екі жыл бойы тәтесі зорлық‑зомбылыққа ұшырап келгенін айтады. Әйел бірнеше рет Оралға қайтып оралған, бірақ азаматтық күйеуі әр жолы артынан барып алып кеткен. Туыстары полиция шақырып, арыз жазғанымен, жиенінің сөзінше, ер адам бостандықта қала берген.

Отбасының қолында дене жарақаттарының суреттері бар.

– Мен тәтеме: егер сен онымен араласуды жалғастыра берсең, біз сенімен сөйлеспейміз деп айттым. Кейін амалсыздан бойұсындым, тек аман болса болды, – дейді Елена.

Туыстарының айтуынша, Малов бұрын сотталған. Қаңтар айында оның тағы бір ісі бойынша сот болуы тиіс еді. Кейін ол отбасына бес жыл шартты жаза алғанын хабарлаған.

Туыстарын алаңдататыны – ер адам Капиталинаның телефонын пайдаланып келген, өзінің жеке нөмірі болмаған. Қазір әйелдің телефоны өшірулі.

Отбасы әйелдің жоғалуына байланысты Батыс Қазақстан облысының полиция органдарына ресми арыз дайындап жатыр.

Редакция ресми түрде Атырау облысы полиция департаментіне әйелдің жоғалуына байланысты арыз тіркелген‑тіркелмегенін және тексеру шаралары жүргізіліп жатқан‑жатпағанын анықтап беруді өтініп, сұрау жолдады. Владимир Маловпен Капиталинаның нөмірі арқылы байланысу мүмкін болмады.

Айнұр САПАРОВА

Бүгін, 18:13