Ортақ тіл табысу оңай емес . Депутат мектептердегі смартфондар туралы кесімді пікір білдірді

Мәжіліс депутаты Асхат Аймағамбетовтен қазақстандық оқушылар үшін смартфондарға толықтай тыйым салу қажет пе деп сұралды. Мәжілісменнің айтуынша, оның жеке ұстанымы балалар мен ата-аналардың пікірімен сәйкес келмейді, деп хабарлайды Tengrinews.kz.

Мәжіліс депутаты Асхат Аймағамбетовтен қазақстандық оқушылар үшін смартфондарға толықтай тыйым салу қажет пе деп сұралды. Мәжілісменнің айтуынша, оның жеке ұстанымы балалар мен ата-аналардың пікірімен сәйкес келмейді, деп хабарлайды Tengrinews.kz.

Депутат болғанға дейін Асхат Аймағамбетов Оқу-ағарту министрі қызметін атқарған. Бүгін ол педагог мәртебесін арттыру және білім беру мәселелері жөніндегі заң жобасын таныстырды. Құжат мектептердегі смартфондарды пайдалануға тыйым салу мәселесін реттейді.

Кулуарда журналистер Аймағамбетовтен гаджеттерге тек сабақ уақытында ма, әлде оқушылар мектепте болған уақытта толық тыйым салу керек пе деген сауал қойды.

"Білесіз бе, смартфондарға қатысты менің ұстанымым бәріне бірдей ұнай қоймас, бірақ ол айқын. Сондықтан өткен жылы оқу сабақтары кезінде смартфон қолдануға тыйым салатын түзетудің авторы болдым. Яғни, 45 минут бойы смартфон қолданылмайды. Бұл - өзекті мәселе. Бірақ қазір ата-аналар айтып жүрген тағы бір мәселе бар - ол балалардың үзіліс кезінде жүгіріп, ойнап, араласудың орнына смартфонға телміріп, ойын ойнауы немесе әлеуметтік желілерде отыруы. Сондықтан бұл норманы реттеу үшін біз Оқу-ағарту министрлігіне тиісті құзырет беруді ұсындық", - деді Асхат Аймағамбетов.

Оның айтуынша, Оқу-ағарту министрлігі әзірлейтін барлық мектепке ортақ ереже оқу орнының директоры мен ата-аналар балалар үшін қайсысы тиімді екеніне келісе алмаған жағдайда мәселені шешуге көмектеседі.

"Бұл мәселе неге шешілмей жатыр? Мектептердің бір бөлігі тыйым салды, кейбірі сала алмай отыр. Қазіргі уақытта ата-аналармен ортақ тіл табысу оңай емес екенін білемін. Сондықтан Оқу-ағарту министрлігінің бірыңғай ұстанымы болсын дейміз, бұл - уәкілетті орган, министрлік балаларымыздың игілігі үшін дұрыс әрі қажетті шешім қабылдайды деп сенемін", - деп толықтырды депутат.

Айта кетейік, Оқу-ағарту министрлігінің өкілдері Мәжілістің жалпы отырысында жекелеген жағдайларда смартфондар оқу процесіне қажет болуы мүмкін екенін, мұны мұғалімдер де растап отырғанын атап өтті. Сондықтан әзірге үзілді-кесілді тыйым салу туралы сөз болып отырған жоқ.

"Біз уәкілетті органның еркіне қарсы шығып, осындай шешім қабылдайық деп волюнтаристік түрде айта алмаймыз. Сондықтан бұл жайттарды әріптестерімізбен екінші оқылымға дейін талқылайтын боламыз. Менің ұстанымым айқын деп ойлаймын, бірақ мұнда әлі де дайындық жұмыстары қажет", - деді Асхат Аймағамбетов.

Оның айтуынша, егер, мысалы, балалардан телефонды мектепке кіре берісте тапсыруды талап етсе, барлық оқу орындарында оларды иелері үшін қауіпсіз сақтайтын қажетті шкафтар немесе басқа да орындар қарастырылмаған.

"Кейбір директорлар мен мұғалімдер неге алаңдайды? Мен мектепте жұмыс істеген адам ретінде айтайын. Мәселе мынада: егер сен баладан сол телефонды жинап алсаң, жауапкершілік туындайды. Барлық мектепте тиісті шкафтар жоқ. Мысалы, шетелдік мектептерде арнайы чехолдар бар: оқушы кіреді, чехол бекітіледі, оны рюкзагына немесе қалтасына салып қояды, бірақ өзі аша алмайды. Алайда бізде мұндай чехолдар бәріне бірдей қолжетімді емес. Сондықтан инфрақұрылым мәселесі, дайындық мәселесі бар (...) Тиімді, дұрыс, теңгерімді шешімдер қабылдау қажет", - деді мәжілісмен.

Мәжіліс депутаттары бірінші оқылымда педагог мәртебесі және білім беру мәселелері туралы заң жобасын мақұлдады. Құжат Оқу-ағарту министрлігіне оқушылардың сабақ кезінде қай жағдайларда смартфон қолдана алатынын шешу құқығын беруді ұсынады.

Тағы оқыңыз: Қазақстанда мұғалімдерден оқушылар үшін жауапкершіліктің бір бөлігі ресми түрде алынады

Google News арқылы жаңалықтарымызды қадағалаңыз