Отандық мұнай газ химиясы серпін алды

Отандық мұнай-газ химия өнімдері шет елде сұранысқа ие. Құзырлы министрлік шикізаттық емес экспорт жанданғанын айтады. Былтыр саладағы өндіріс көлемі 12%-ға өсті.

Отандық мұнай-газ химия саласы шикізаттық емес экспорттың жаңа қозғаушы күшіне айналды. Сыртқы нарықта полипропилен, бензол, параксилол сынды терең өңделген өнімдер сұраныста. 

Ерлан Ақкенженов, ҚР Энергетика министрі:

- Саланың болашағы ауқымды құрылыс кезеңімен тығыз байланысты. Елде әлемдік деңгейдегі ерекше мұнай-химиялық кешендер салынып жатыр. Атырау облысында полиэтилен зауытының болашақ пиролиз қондырғысының құрылысы үшінші кезеңге жетті, ал Павлодарда алкил шығаратын кәсіпорынның құрылысы басталды.

Былтыр мұнай-газ химия саласында 590 мың тонна өнім алынды. Үкімет көрсеткішті еселеуге мүдделі. Бұл үшін 2030 жылға дейінгі жол картасы бекітілді. Заң қабылданады.

Темірлан Үркімбаев, ҚР Энергетика министрлігі Мұнай-газ химиясы және техникалық реттеу департаментінің директоры:

- Қазір біз Мұнай-газ химия өнеркәсібі туралы заң әзірлеп жатырмыз. Мұндай заңнама Кеңес одағы тарихында болмаған. Заң не үшін қажет десеңіз, біріншіден, Республика үшін де, инвестор үшін де, нақты құқықтық негіз болады. Сонда инфрақұрылымды дамытып, ішкі нарық қажеттіліктерін қамтып, экспорттық потенциалымызды ұлғайта аламыз. Себебі мұнай-газ химиясы бұл - жаңа өнеркәсіп. Оны дамыту үшін үлкен жұмыс жүргізіліп жатыр.

Мұнай-газ химиясын дамытуға мемлекет басшысының өзі басымдық беріп отыр. Бекер емес. Бұл сала елдің дамуына тікелей серпін береді. Экспорт үшін де қажет. Минералды тыңайтқыш, медицина мен тұрмыста қолданылатын өнімдер, отын. Бұлардың қай қайсысын алсақ та, маңызды. Енді Атырау, Павлодар, Шымкенттегі ірі өңдеу орындарын жаңғыртып, күрделі өнім шығаруға бейімдеу міндет.

Авторы: Мерей Мұратханқызы