Ақтөбе облысында сотталған адам УҰИ дан өршелене қашып кетті

Ақтөбе облысының мас күйінде көлік басқарғаны үшін сотталған 33 жастағы тұрғыны уақытша ұстау изоляторынан қашып кетті. Ер адам ғимараттың шатырына шығып, тікенек сымнан аттап өткен, бірақ алысқа ұзап үлгермеді, деп хабарлайды Tengrinews.kz "Диапазон" басылымына сілтеме жасап.

Ер адам қалай қашқан?

Басылымның жазуынша, Қарғалы ауданының тұрғыны бұған дейін жүргізуші куәлігінен айырылған. Соған қарамастан, ол тағы да мас күйінде рөлге отырған. Жасалған қылмысы үшін сот оған нақты жаза тағайындады.

Үкім шыққаннан кейін бірнеше күн өткен соң, ер адам Бадамша ауылындағы Қарғалы аудандық полиция бөлімінің уақытша ұстау изоляторынан қашуды ұйғарған.

Сот материалдарына сәйкес, кешкі серуен кезінде ол ішкі серуендеу ауласының есігіндегі аспалы құлыпты ашып, басқа аулаға өткен.

Сол жерде ер адам қабырғадан шығып тұрған ұлутас бөлігін итеріп, арматураны сындырып, ғимараттың шатырына шыққан. Осыдан кейін ол тікенек сымнан асып түсіп, бостандыққа шығып кеткен.

Қашқаннан кейін ер адам Кемпірсай ауылына қарай жаяу бет алған. Содан кейін Ақтөбеге бара жатқан жолай көлікке отырған. Алайда ол қалаға жете алмады. Полицейлер оны сол күні ұстады.

Сотта ол өз кінәсін толық мойындады.

Қашқаны үшін ер адам ҚР Қылмыстық кодексінің 426-бабы ("Бас бостандығынан айыру орындарынан, қамаудан немесе күзеттен қашу") бойынша бір жарым жылға бас бостандығынан айырылды.

Алдыңғы үкім бойынша өтелмеген жаза мерзімін ескере отырып, сот оған түпкілікті екі жылға бас бостандығынан айыру жазасын кескен.

Еске салсақ, маусым айында Семейде жақында ғана шартты жазасы нақты мерзімге ауыстырылған сотталушы серуендеу кезінде УҰИ-дан қашып кеткен болатын.

Бізді Google-дың негізгі дереккөздер тізіміне қосыңыз