Отбасы банк үздік салық төлеуші ретінде танылды

Отбасы банк Астана қаласы бойынша Мемлекеттік кірістер департаментінен «Үздік салық төлеуші» марапатын алды.
Бұл банктің ашық әрі адал салық саясатының мойындалуы ретінде бағаланды.

2024 жылы банк 34,5 млрд теңге, ал 2025 жылдың 11 айында 42 млрд теңге салық төледі. Оның 35,3 млрд теңгесі республикалық бюджетке, 2,98 млрд теңгесі жергілікті бюджеттерге аударылды. Биыл әлеуметтік төлемдерге 3,65 млрд теңге бөлінді. Жыл соңында банк жалпы 51,7 млрд теңге салық пен төлем аударуды жоспарлап отырғаны рекордтық көрсеткіш деуге болады.

Астанаға көшу Отбасы банк үшін жаңа кезең болды: енді төленген салықтың бір бөлігі елорда бюджетінде қалып, мектептер, балабақшалар, жолдар және қала инфрақұрылымын дамытуға жұмсалады.

Банк елорда жастарына арналған «Елорда жастары» бағдарламасын іске асыруда да маңызды рөл атқарады. 2021 жылдан бері бағдарлама арқылы 960 адам баспанаға қол жеткізді. Сонымен қатар әлеуметтік осал топтарға төмен пайыздық мөлшерлемемен жеңілдетілген қарыздар беріліп, соңғы екі жылда 407 отбасы жаңа үй алды.