Қазақмыс әлеуметке бағдарланған үздік компания деп танылды

Елордада «Парыз» республикалық байқауының жеңімпаздары марапатталды.

Бизнестің әлеуметтік жауапкершілігі бағытындағы бұл сайыста Ұлытау облысының «Қазақмыс корпорациясы»  бас жүлдені жеңіп алды. Марапатты Мемлекет басшысы арнайы табыстады.

Сәтпаев қаласында 320 орындық балабақша, Жезқазған қаласында 8 мың шаршы метрлік заманауи спорт кешені, 900 балаға арналған Шахмат академиясы. Қазақмыс корпорациясының өңірде тек биыл ғана іске қосқан әлеуметтік жобалары бұнымен шектелмейді. Мақсат - аймақты дамытуға үлес қосу. Енді міне корпорацияның игі бастамалары еленіп, үздіктер қатарында көш бастады.

Нұрахмет Нуриев, «Қазақмыс корпорациясы» ЖШС Басқарма төрағасы:

- Үздік атану үшін қолдан келгеннің бәрін жасадық. Ұлытау облысы кейінгі үш тоқсан бойы Қазақстан бойынша жалақысы ең жоғары облыстар қатарында екінші орынды иеленуде. Біздің  жұмысымыздың нәтижелері ең алдымен мыңдаған жұмыскерден тұратын үлкен ұжымымыздың еңбегінің арқасында болып отыр.

Бүгінде корпорацияда 38 мыңнан астам адам еңбек етеді. Биыл жұмыскерлердің жалақысы инфляция мөлшеріне сай индекстелді. Әр тоқсан сайын сыйақы енгізілді. 60 қызметкерге баспана сыйға тартылды. Жаңа ұжымдық шартқа қол қойылып, қызметкерлер үшін ерікті медициналық сақтандыру бағдарламасы кеңейтілді.

Нұрахмет Нуриев, «Қазақмыс корпорациясы» ЖШС Басқарма төрағасы:

- Қазақмыс тек табыс табу, кәсіпкерлік емес деп, жыл сайын айтып келеміз. Біз жылдар бойы өзімізді отбасыларға қамқорлық танытатын, адамдардың әлеуметтік қорғалуына мән беретін әлеуметтік бағдарланған компания ретінде ұстанамыз.

Биыл Қазақмыс әлеуметтік қолдау шараларына 90 млрд теңгеден астам қаражат бағыттады. Корпорация өңірлерде өмір сүру сапасын арттырып, қызметкерлердің кәсіби өсуі үшін жағдай жасауын жалғастырады.

Рухани Әбдірахман