Қазақстандық инженердің дроны АҚШ та үздік деп танылды

Қазақстандық инженердің дроны АҚШ-тағы ауқымды конференцияда үздік ондыққа кірді.

Өнертапқыштар, әскерилер мен кәсіпкерлер бас қосқан Defence TechConnect (Дэфэнс Тэк Каннект) жиынында Ерлан Әлімхановтың өнертабысы 200-ге жуық тың жобаның арасынан озық шықты. 360 градусқа бұрылатын вертикалды модулі бар "MegaDrone 360" сегіз түрлі бағытта қызмет ете алады.

Шығыс Қазақстанның тумасы Ерлан Әлімхановтың өнертабысы осы. Вертикалды 360 градусқа бұрылатын бөлігі бар дрон Defence АҚШ-тың қорғаныс саласындағы ауқымды конференциясында үздіктер  қатарына кірген. Қазақстанда өндірістік дизайнер болып жұмыс істеген маман 2021 жылы Американың талант визасына ие болып, ұшқышсыз құрылғыларды жобалаумен айналысқан. Ал финалист атанған MegaDrone 360 дроны екі жылдық тынымсыз еңбектің арқасында дүниеге келіп, 200-ге жуық тың жобаны басып озған.

Ерлан Әлімханов, инженер-дизайнер:

«Әрине, әлем АҚШ-ты қару-жарақ пен әскери технология саласындағы әлемдік көшбасшы деп таниды. Сондықтан бұл жетістік тек жеке мен үшін емес, бүкіл Қазақстан үшін маңызды нәтиже деп санаймын. Қазақстаннан шыққан инженердің АҚШ-тағы дрон әзірлеушілердің үздік ондығы қатарына енуі үлкен мәртебе. Мен бұған шын көңілден қуаныштымын. Әрі кеудемді елім үшін зор мақтаныш кернеп тұр. Бүгінгі презентацияда мен өзімді «Қазақстаннан шыққан инженер” деп, арнайы визамен келгенімді айтып таныстырдым. Американдықтар Қазақстанда да білікті инженерлер мен озық ойлы мамандардың бар екенін біле жүрсін».

Ерлан Әлімхановтың дронының тағы бір ерекшелігі модульдерінің ауысуында. Соған сай оны төтенше жағдайларда құтқару, денсаулық сақтау, өрт сөндіру, жүк тасымалы және ойын-сауық саласындағы түрлі мақсаттарда қолдануға болады. Десе де, геосаяси жағдай аумалы-төкпелі заманда Вашингтондағы сарапшылар бұйымның әскери бағытта қолданылуына зор қызығушылық танытқан.

Уильям Хюз, бизнес бойынша кеңесші:

- Бұл конференция ең алдымен қорғаныс саласындағы ауқымды жиын. Және соңғы жылдары дәл осы салада дрондардың маңызы жоғары жылдамдықта артып барады. Украина бұған мысал. Ал Ерлан Әлімхановтың дроны әскери тұрғыдан да тамаша олжа. Себебі оның 360 градуста айнала алатын қабілеті бар. Бұл майдандағы стратегияны өзгертуі мүмкін. Тек онымен шектелмей, медициналық миссияларда, құтқару шараларында, өрт сөндіру секілді көп мақсатта қолдануға болатыны өнертабысты бірегей етіп отыр.  

Қазір Калифорния штатының Фремонт қаласында жобалаумен айналысып жатқан Ерлан Әлімханов прототипті ары қарай да жетілдіріп, инвестиция тартуды ойлайды.  Тіпті дронды  алысқа тасымалдайтын төрт аяқты құрал жасауды жоспарға алған. Оның есептеуінше, осындай бір дронның құны 60 мың доллардан басталуы мүмкін. Бәсекеге қабілетті өнім жасау жолында өзге де шеберханалармен, дрон және бағдарламалау саласындағы мамандармен бірлесе еңбек етуді көздеп отыр. 

Ердана Ержанұлы, Эндрю Фанг