Пәтерімді айырбастаймын : Ақтөбеде ер адам 17 тұрғынды алдап кеткен

АЛМАТЫ, 10 шілде – Sputnik. Ақтөбеде тұрғындарды алдады деген күдікпен ұсталған 46 жастағы ер адамға қатысты қылмыстық іс тергеліп жатыр. Бұл туралы қалалық полиция басқармасы хабарлады.

Тергеу мәліметінше, күдікті өзінің үш бөлмелі пәтерін ауданы кіші баспанаға қосымша ақы алу арқылы айырбастайтынын айтып, хабарландыру берген.

"Осы ұсынысқа қызығушылық танытқан азаматтардан ол айырбастау үшін қарастырылған үстеме ақшаны алған. Алайда кейін байланысқа шықпай, келісім бойынша міндеттемелерін орындамаған", - деп жазылған хабарламада.

Алдын ала мәлімет бойынша, күдікті 2025 жылдың соңынан бері осындай жолмен Ақтөбе қаласының 17 тұрғынын алдаған. Алған ақшаны жеке қажеттіліктеріне жұмсаған.

Қазіргі уақытта аталған факті бойынша алаяқтық бабымен сотқа дейінгі тергеп-тексеру жүргізіліп жатыр. Тергеу барысында күдіктінің өзге де осыған ұқсас қылмыстарға қатысы бар-жоғы анықталады.