Пәтерін жалға беретіндер табысының қанша пайызын салыққа жұмсайтыны белгілі болды

2026 жылдан бастап тұрғын үйді жалға беру мен қайта жалға алу қызметі өзін-өзі жұмыспен қамтығандарға арналған ресми тізімге енгізіледі, – деп хабарлайды Aikyn.kz сайты krisha.kz сайтына сілтеме жасап.

Енді пәтерін жалға беретін азаматтарға жеке кәсіпкер (ЖК) ретінде тіркелудің қажеті болмайды. Олар табысының 4%-ын ғана әлеуметтік төлем ретінде төлейді.

2026 жылдың 1 қаңтарынан бастап Қазақстанда жаңа Салық кодексі күшіне енеді. Соның аясында бұрынғы жеңілдетілген салық түрлері – патент, E-Salyk және басқа да режимдер алынып тасталады. Олардың орнына өзін-өзі жұмыспен қамтығандарға арналған жаңа салық жүйесі енгізілмек.

Бұл жаңашылдық пәтерін жалға беріп табыс табатын азаматтар үшін тиімді. Бұған дейін олар не жеке кәсіпкер болып тіркелуге, не табысының 10%-ын салыққа төлеуге мәжбүр еді.

2020-2023 жылдары бұл санаттағы азаматтар Бірыңғай әлеуметтік төлемді (БӘТ) пайдаланып келген. Алайда бұл режим 2024 жылдан бастап күшін жойды. Енді жаңа жүйе дәл сол БӘТ-тің орнын басады.

Жаңа салық режимі бойынша:

- айлық табыс 300 АЕК-тен аспауы тиіс (шамамен 1,2 млн теңге);                                                                                    - қызмет тек жеке тұлғаларға көрсетіледі;                                                                                                                          - жалдамалы қызметкерлер болмайды.

Мысалы, егер азамат пәтерін айына 300 мың теңгеге жалға берсе, жылдық табыс 3,6 млн теңге болады. 4% мөлшеріндегі төлем – жылына 144 мың теңге, яғни айына 12 мың теңге ғана.

Жүйе толық іске қосылған соң, әлеуметтік төлемдер арнайы мобильді қосымша арқылы автоматты түрде жүргізіледі. Қосымша әзірге таныстырылған жоқ.

Жеке кәсіпкер ретінде тіркелген азаматтар 2025 жылдың соңына дейін салық органына №029 нысан бойынша өтініш беріп, жаңа режимге ауысуы тиіс.
Ал жаңа арендаторлар жүйеде алғашқы төлем жасаған сәттен бастап автоматты түрде тіркеледі.

Өзін-өзі жұмыспен қамтығандар үшін рұқсат етілген қызмет түрлерінің толық тізімін Ұлттық экономика министрлігі 26 қыркүйекте жариялады. Сол тізімге тұрғын үйді жалға беру мен қайта жалға алу да енді.

Экономистердің айтуынша, бұл өзгеріс көлеңкелі нарықты азайтып, салық түсімдерін арттырады және азаматтарға заңды түрде табыс табуды жеңілдетеді.