Мемлекетке салық төлемей, үйін жалға беретіндер енді айыппұл арқалайды

Қаржы вице-министрі Ержан Біржанов Мәжіліс кулуарында тұрғын үйді салықсыз жалға беретін азаматтарды қалай анықтап жатқанын айтты, – деп хабарлайды Aikyn.kz сайты.

Оның сөзінше, бұл бағытта кешенді жұмыстар жүргізіліп жатыр.

«Біз қазір ақпаратты дәл алып отырмыз. Барлық мемлекеттік органдармен 74 интеграция жүргізілді, деректер базасы іске қосылды. Мемлекеттік кірістер комитеті Big Data жүйесін іске қосты. Бұл тәуекелдерді, сондай-ақ нысандарға иелік етіп, бірақ онда нақты тұрмайтын, не басқа қалаларда тұратын тұлғаларды дәлірек анықтауға мүмкіндік береді. Бұған қоса, банк аударымдары бойынша да талдау жүргізіліп, неғұрлым сапалы зерттеу жасауға жол ашылды», – деді вице-министр.

Оның айтуынша, бұл жұмыс құқық қорғау органдарымен, мүлік иелері бірлестіктері (МИБ) және пәтер иелерінің кооперативтерімен (ПИК) бірлесе атқарылып жатыр.

Сонымен қатар Ержан Біржанов салық төлеуге қатысты тиімді әрі жеңілдетілген тетіктердің қарастырылғанын атап өтті.

«Пәтерін жалға беретін азаматтарға жеңілдетілген, тиімді режимдер қарастырылған. Мысалы, тіркелмей-ақ пәтерді жалға беруге болады, кейін бір жыл өткен соң жылдық декларация тапсырады. Бұл рәсім жеңілдетілген тәртіппен жүзеге асырылады. Салық мөлшерлемелері де төмен: жеңілдетілген декларация бойынша 3%, ал өзін-өзі жұмыспен қамтығандар үшін 4% болады. Егер жеке кәсіпкер ретінде тіркелмесе, онда жылдық декларация тапсырып, табыстан 10% төлейді», – деп түсіндірді ол.

Мемлекеттік кірістер органы мұндай азаматтарды анықтаған жағдайда, олардан бір ай ішінде тіркеліп, салық төлеуді талап етеді.