Экологияға зиян келтіргендер айыппұл арқалайды

Елдегі ауа сапасы қатаң бақыланады. Қоршаған ортаға зиян келтіргендерге айыппұл қарастырылған. Ауаға лас заттарды шектен тыс шығарған кәсіпорындар да жауапкершіліктен қаша алмайды. Мәселен, 2023 жылы экологиялық инспекторлар нысандарға 600-ден астам тексеру жүргізіп, бір жарым мыңнан астам бұзушылықты анықтаған. Нәтижесінде кәсіпорындарға 13 миллиард теңге айыппұл салынды. Былтыр жоспардан тыс бақылауды қоса алғанда, бір мыңнан астам тексеріс жүргізілді. Оның аясында да бұзушылықтар анықталып, тиісті нысандар 87 миллиард теңгеге жуық айыппұл арқалады. Ал биылғы 8 айдың көрсеткіші де белгілі. Жыл басынан бері 2 мыңға жуық бұзушылық тіркеліп, кәсіпорындардан 4 миллиард теңге өндірілді.

Қайсар Бектібаев, ҚР ЭТРМ комитеті басқармасының бас сарапшысы:

- Бұл әкімшілік айыппұлдар негізінен республика аумағында орналасқан ірі компанияларға салынған. Мұнай компаниялары, мұнай-газ өндіру, сонымен қатар түрлі кәсіпорындар. Осы кәсіпорындарға қатысты тексеру барысында анықталған заң бұзушылықтар бойынша әкімшілік айыппұлдар салынған. Бұл негізінен экологиялық рұқсатсыз жұмыс істеуге қатысты салынған айыппұлдар болып табылады. Әкімшілік айыппұл салудан басқа, бізде сот органдарына экорұқсатсыз жұмыс істеуіне байланысты кәсіпорынның қызметін тоқтату бойынша талап-арыз беруге құқылымыз.