​Павлодарда тұрғын көршісіне ортақ жерді беріп қойған әкімдікті сотта жеңіп шықты

Кассациялық сот Павлодар әкімінің тұрғынға қосымша жер телімін беру туралы қаулысын заңсыз деп тапты.

Шешім қабылданған сәтте бұл аумақ ортақ пайдаланылатын жерлерге жатқызылған болатын.

Әкімдік қаулысына көрші жер телімінің меншік иесі дау айтты. Ол даулы аумақта инженерлік коммуникациялар орналасқанын және автотұрақ жабдықталғанын көрсетті.

Бірінші сатыдағы және апелляциялық сот әйелдің талап арызын қанағаттандырудан бас тартты. Дегенмен, кассациялық инстанция жер мәртебесін өзгертудің міндетті процедурасы жүргізілмегенін, ал жер телімін беру кезінде жер заңнамасының талаптары сақталмағанын анықтады.

Бұдан бөлек, төменгі сатыдағы соттар инженерлік коммуникациялардың болуына және даудың басқа да маңызды мән-жайларына тиісті баға бермеген.

Кассациялық сот мемлекеттік органның шешімін ол қабылданған сәтте қолданыста болған заңнамаға сәйкес бағалау қажеттігін атап өтті. Сенімді қорғау принципі заңға қайшы әрекеттерді ақтау үшін қолданыла алмайды.

Нәтижесінде бірінші және апелляциялық инстанциялардың сот актілерінің күші жойылып, көрші жер телімі иесінің талап арызы қанағаттандырылды, ал әкімнің қаулысы заңсыз деп танылды.

Бүгін, 09:27