Астаналық тұрғын Қорғаныс министрлігіне қарсы сотта жеңіп шықты

Фото: istockphoto.com

Мамандандырылған ауданаралық әкімшілік соттың мәліметінше, талапкерге 2009 жылы қызметтік пәтер берілген. 2025 жылы тұрғын жалдау шартын ұзартуға өтініш берген. Алайда кәмелетке толған қызының атында тұрғын үй рәсімделгеніне байланысты оның өтініші қабылданбаған.

Сот кәмелет жасына жетіп, бөлек тұратын балалардың жеке мүлкі қызметтік баспана беру шартының өзгеруіне себеп бола алмайтынын мәлімдеді.

«Сот талапкердің кәмелетке толған балалары бөлек тұрып, дербес шаруашылық жүргізетінін анықтады. Сонымен қатар бөлек тұратын кәмелетке толған отбасы мүшесінің меншігінде тұрғын үй болуы қызметтік тұрғын үйді жалдау шартын ұзартудан бас тартуға автоматты түрде негіз бола алмайды», делінген хабарламада.

Осылайша сот бас тартуды заңсыз деп танып, жауапты органға істі қайта қарауды міндеттеді.

«Өзінің үйі емес»: Депутат қызметтік пәтері туралы мәлімдеме жасады

Еске сала кетейік, бұған дейін Қорғаныс министрлігі әскерилерге қаржылық қолдаудың артатынын мәлімдеген болатын. Нақтырақ айтсақ, некеге тұру, бала туу, бала асырап алу, мүліктік залал немесе емделу қажет болған жағдайда әскери қызметкерлерге үш еселенген мөлшерде сыйақы (255 мың теңгеге дейін) беріледі.