​Пенза мен Сарапулдағы Wildberries компаниясының логистикалық нысандарында шабуылдан кейін өрт шықты

30 шілде 2026 жылы Wildberries компаниясының логистикалық объектілерінде өрт шықты, деп хабарлады АА. 

Пенза қаласындағы қоймаға жасалған шабуылдан кейін бір адам жарақат алып, шамамен 200 адам эвакуацияланды. Өртті сөндіру үшін арнайы қызметтер жұмылдырылды.

Сарапул қаласындағы объектіде де әуе дабылы жарияланып, алдын ала эвакуация жүргізілді. Шабуылдан кейін өрт шыққанымен, зардап шеккендер жоқ екені хабарланды.

Компания логистикалық тізбектерді қайта құрып, жеткізілімдер мен тапсырыстарды басқа объектілер арқылы орындап жатқанын мәлімдеді.

Соңғы апталарда Ресейдің әртүрлі аймақтарындағы ірі қоймалар украиналық дрондардың шабуылына ұшырап отыр. Бұған дейін Тамбов, Мәскеу облысы, Краснодар және Ставрополь аймақтарындағы Wildberries орталықтары зақымданған. Ең ауыр жағдай 18 шілдеде Тамбов облысының Котовск қаласында тіркелді: қоймаға жасалған шабуылдан 25 адам жарақаттанды, олардың 23-і ауруханаға жеткізілді.

Украина президенті Владимир Зеленский әлеуметтік желідегі жазбасында бұл логистикалық орталықтар «ресейлік армияны жабдықтау үшін пайдаланылғанын» айтты.

Бүгін, 12:15