Премьер министр жекеменшік мектептерге қатысты тапсырма берді

АСТАНА, 6 қаңтар – Sputnik. Үкімет басшысы Олжас Бектенов президенттің кешегі сұхбаты аясында жекеменшік білім беру мен медициналық ұйымдарды қаржыландыру тетіктерін қайта қарауды тапсырды, деп хабарлайды Sputnik Қазақстан Primeminister.kz сайтына сілтеме жасап.

Бүгінде мемлекеттік мектептерде орын болмаған жағдайда баланы жекеменшік ұйымда оқытуға болады. Әрбір оқушы үшін мемлекеттен субсидия беріледі.

"Десе де бұл мүмкіндікті теріс пайдалану деректері тіркеліп отыр. Субсидия көлемін көбейту мақсатында оқушылар мен мұғалімдердің жасанды легі туындауда, ал өз кезегінде бұл білім сапасына, сондай-ақ мемлекеттік шығындардың тиімді жұмсалуына теріс әсер етеді", - делінген ресми хабарламада.

Мәселен, аудит кезінде 1 333 оқушының бір мектептен екінші мектепке 5, тіпті 12 рет көшуі анықталды. Ал 64 жекеменшік мектепте оқушылардың саны жобалық қуаттан екі есе артық болған. Бұдан бөлек, 2024 жылы 167 жеке мектептің салықтық есептілігінде кірістер көрсетілмеген. Салықшылардың ескертуінен кейін ғана 1,2 млрд теңге көлемінде салық төленген. Қазіргі кезде 46 мектепке қатысты тексеріс жүргізіліп жатыр.

"e-Qazyna.kz веб-порталында 789 жеке мектеппен 78,7 миллиард теңге көлемінде қаржыландыру келісімдері жасалған. (2025 жылы – 845 мектеп). Сондай-ақ, бұрын қаржыландырылған 206 мекеме белгіленген талаптарға сай келмейді. Оқушылар мен мұғалімдерді жалған тіркеу және қосарланған есепке алу, рұқсат етілген жобалық қуаттан артық жүктеу және тағы басқа жағдайлар анықталды", - дейді қаржы министрі Мәди Такиев.

Оның айтуынша, алдағы уақытта мемлекеттік мектептер (6 887 мектеп), балабақшалар мен университеттер де цифрландырылады. Сол кезде білім беру қызметтерін бюджеттен қаржыландырудың барлық циклін ашық көріп отыруға болады.

Жиын барысында жекеменшік білім беру мекемелерін лицензиялау тәсілдерін қайта қарау мәселесі де қаралды.

Премьер-министр элиталық мектептер мәселесін де қозғалды. Мұндай мектептерде ата-аналардың төлемдері оқу процесін толық қамтамасыз етуге мүмкіндік береді. Сондықтан ондай мекемелерді мемлекеттік бюджеттен қаржыландырудың қажеті жоқ.