Путин қазақ қызын Отан алдындағы еңбегі үшін орденімен марапаттады

Омбылық спортшы Салтанат Меденова бокстағы жетістіктері үшін Кремльде марапатталды. Кремльдің ресми сайтындағы мәліметке сәйкес, әлем чемпионы ІІ дәрежелі «Отан алдындағы еңбегі үшін» орденінің медалімен марапатталды.

Меденова Омбы облысынан шыққан әйелдер арасында бокстан әлем чемпионы атағын иеленген алғашқы спортшы болды. 25 жастағы боксшыны жеңісімен Омбы облысының губернаторы Виталий Хоценко да құттықтады.

Марапаттау рәсімі кезінде Владимир Путин әйелдер боксындағы жетістіктерге ерекше тоқталып өтті:

«Бұл, бір қарағанда, ерлерге тән спорт түрі сияқты көрінгенімен, біздің қыздарымыздың да өздерін ең жақсы жағынан көрсетіп жүргенін ерекше атап өткім келеді», — деді РФ Президенті.

Салтанат Меденова орта және жартылай ауыр салмақ дәрежелерінде өнер көрсетеді. Ол — Ресейдің еңбек сіңірген спорт шебері, бокстан Ресей құрамасының мүшесі және 2025 жылғы әлем чемпионы. Сондай-ақ оның қоржынында Ресейдің төрт дүркін чемпионы атағы мен Еуропа чемпионаттарының жүлделі орындары бар.

Салтанат Меденованың өмір тарихы оның тегіне байланысты қазақстандық аудиторияның назарын аударды. Бұған дейін «Спорт Министрі» жобасына берген сұхбатында ол этникалық қазақ екенін және Орта жүздің Қыпшақ (Құлытай) руынан шыққанын айтқан болатын. Спортшының сөзінше, оның ата-анасы Омбыда туған. Отбасы негізінен орыс тілінде сөйлескенімен, әжесі әлі күнге дейін қазақ тілінде сөйлейді.

Салтанат Меденова 2001 жылы 27 сәуірде Омбы қаласында дүниеге келген. 2025 жылы ол Ресей құрамасы сапында 81 келіге дейінгі салмақ дәрежесінде бокстан әлем чемпионатын жеңіп алды.

Бүгін, 10:38