Қ. Тоқаев биылғы халықаралық кездесулердің нәтижесіне тоқталды

Даңқты қолбасшы Бауыржан Момышұлына «Халық Қаһарманы» атағы берілді.

Бұл жайында бүгін батыр бабаның туған өңірі Жамбыл облысына барған Президент жергілікті жұртпен кездесу барысында айтты. Бұған қоса батыр есімі Таразда жуырда ғана ашылған әскери мектеп-интернатқа берілді. Сонымен қатар Қасым-Жомарт Тоқаев елдегі жалпы экономикалық ахуалға тоқталып, жыл бойы жүргізген халықаралық кездесулердің нәтижесіне тоқталды.

Риат Шони, тілші:

- Тараз — тарих пен жаңғыру тоғысқан шаһар. Мыңжылдықтар үнін сақтаған көне Әулиеата бүгінде заманауи тыныспен түлеп, Жамбыл облысының әлеуметтік-экономикалық жүрегіне айналып отыр. Қала көшелерінде өткеннің ізі мен бүгіннің қарқыны қатар сезіледі. Көне Жібек жолының бойында бой көтерген бұл шаһар бүгін де дамуға бет алып, тарихына тағзым ете отырып, болашаққа нық қадам басып келеді.

Жамбылдық жұртпен кездескен Президент өңірдің даму қарқыны жақсы деңгейде екенін айтты. Биыл облыста 63 мыңнан астам жаңа жұмыс орны ашылып, 280-нен аса елді мекенге көгілдір отын жеткізілді. Тағы мектептер салынып, емдем мекемелері де ашылып жатыр. Еліміз қуатты болуы үшін ең алдымен, аймақтар қуатты болуға тиіс.

Президент инклюзивті спорт орталықтарын салуды тапсырды

Бәріне бірдей тең мүмкіндік. Жиын барысында Президент ерекше күтімді қажет ететін балалар мәселесіне де тоқталды. Осы ретте мемлекет басшысы Үкіметке әкімдермен бірлесіп, барлық өңірде Инклюзивті спорт орталығын салу туралы тапсырма берді.

Қасым-Жомарт Тоқаев, Қазақстан Республикасының Президенті:

- Кеше мен Астанадағы Инклюзивті спорт орталығында болдым. Сондай орталықтарды еліміз бойынша басқа аймақтарда салу қажет деп санаймын. Үкіметке әкімдермен бірлесіп, бұл мәселені жан-жақты пысықтап, шұғыл шаралар қабылдауды тапсырамын. Шын мәнінде мұндай нысандардың тек елордада ғана болғаны дұрыс емес, әрбір облыста салу керек.

Халықаралық кездесулер нәтижесі

Бұдан бөлек Қасым-Жомарт Тоқаев жыл бойы жасаған шетелдік іс-сапарлары мен кездесулері жайлы да айтты. Осындай жүздесулердің арқасында жалпы құны 70 млрд доллардан асатын коммерциялық келісімдерге қол қойылған. Еліміз инвестиция тартуда аймақта көш басында келеді.

Қасым-Жомарт Тоқаев, Қазақстан Республикасының Президенті:

- Аймаққа тартылған инвестицияның 60 пайыздан астамы Қазақстанға тиесілі. Инвестициямен бірге жаңа технология, білім келеді, бірлескен ғылыми-техникалық орталықтар мен шетелдік жоғары оқу орындарының филиалдары ашылады. Қазақстан тауарлары мен отандық бизнеске кез келген шекара ашық. Сондықтан барша шетелдік серіктестермен өзара тиімді ынтымақтастық құру – заман талабы, тіпті өмірлік қажеттілік. 

Халықаралық кездесулер демекші, осыдан екі күн бұрын Қасым-Жомарт Тоқаев АҚШ Президентімен телефон арқылы сөйлескен. Мемлекет басшысы Қазақстанда орнығып жатқан «Заң мен тәртіп» қағидатына Дональд Трамп та қолдау білдіргенін жеткізді. Америка басшысы да осындай саясатты жүргізуде. 

Б. Момышұлына «Халық қаһарманы» атағы берілді

Тәртіпке бағынған құл болмайды. Киелі Әулиеата жері даңқты қолбасшы Бауыржан Момышұлының туған өңірі. Батыр бабаның ізін жалғаған жас өрендер Таразда жуырда ғана ашылған әскери мектеп-интернатта оқып жатыр. Бүгін Президент бұл білім ұясына Бауыржан Момышұлының есімін беруді ұсынып, Үкіметке дәл осындай мектептерде өзге өңірлерде де ашуды тапсырды. Бұдан бөлек Қасым-Жомарт Тоқаев батыр бабаның жерлестері алдында өзінің сүйінші жаңалығында жеткізді.

Қасым-Жомарт Тоқаев, Қазақстан Республикасының Президенті:

- Даңқты қолбасшының нағыз ерлік жолы елімізбен қатар, шетелдерде өте танымал. Халқымыз оны қаһарман тұлға ретінде құрмет тұтады. Бірақ әйгілі батырға ресми түрде «Халық қаһарманы» атағы берілмеген. Облыс жұртшылығы, зиялы қауым өкілдері, тіпті, жастарымыз да осы мәселені көтеріп жүргенін білеміз. Тарихи әділдікті қалпына келтіруіміз керек. Сондықтан мен Мемлекет басшысы ретінде Бауыржан Момышұлына «Халық қаһарманы» атағын беру туралы шешім қабылдадым. Тиісті Жарлыққа бүгін қол қойдым.

Сөз соңында Мемлекет басшысы жамбылдықтарға ел дамуына қосқан үлесі үшін алғыс айтты. Президенттің айтуынша, «Жұмысшы мамандықтары жылы» аясында еңбек адамдарына ерекше құрмет көрсетілді және бұл дәстүр алдағы уақытта да жалғасады. 

Риат Шони, Ержан Қанапияұлы және Бахытбек Нұртаев