Қ. Тоқаев: Отаншылдық жылтырақ сөзбен бағаланбауға тиіс

Отаншылдық жылтырақ сөзбен, жалған әрекетпен бағаланбауға тиіс. Қасым-Жомарт Тоқаев Түркістан газетіне берген сұхбатында осылай деді.

Мемлекет басшысы: Нағыз отаншыл азамат жұрттың алдында кеудесін соғып көпірмейді, етегі жасқа толып еңіремейді, оңды-солды сұхбат беріп ділмәрсімейді. Отаншыл болу – туған еліңнің, отбасыңның игілігі үшін аянбай еңбек ету деген сөз. Қоқысты жинау, тал егу, табиғатты аялау, үлкенге құрмет, кішіге ізет көрсету де – отаншылдықтың белгісі деді.

Қасым-Жомарт Тоқаев, ҚР Президенті:

- Мен бұған дейін қоғамдық өмірдің «Бірлігіміз – әралуандықта» деп аталатын маңызды қағидатын жарияладым. Бұл азаматтарымыз бірін-бірі құрметтеп, сабыр сақтап, тәртіпті болуы қажет дегенді білдіреді. Тағы да қайталап айтайын: Қазақстан үшін «Заң мен тәртіп», қолмен істегенді мойынмен көтеру қағидаттары айрықша маңызды. Әйтпесе жоспарларымызды орындап, мақсаттарымызға жету екіталай болмақ.