Қайрат хорватиялық клубпен тең тарқасты

Теннистен Александр Шевченко Аустралиядағы турнирдің ширек финалына жолдама алды. Жерлесіміз 1/8 айналымда әлемнің 55-ші ракеткасы венгриялық Мартон Фучовичпен кездесіп, 2:0 есебімен жеңіске жетті. 

Қос сет қорындысы бойынша 6:3, 7:6 есебі тіркелді. Енді ол жартылай финалға шығу үшін әлемдік рейтингте 36-шы орында тұрған франциялық теннисшімен ойнайды. 

«Қайрат» хорватиялық клубпен тең ойнады. Алматылық ұжым Абу-Дабиде өткен оқу-жаттығу жиынында «Вараждин» командасымен жолдастық кездесу өткізіп, тең тарқасты. Қос клуб 90 минут бойы бір-бірінің қақпасынан саңылау таба алмады. Матч 0:0 есебімен аяқталды. Енді «Қайрат» футболшылары ертең Дубайға аттанып, әрі қарай Алматыға ұшады. 

Айта кетейік, жерлестеріміз 4 қаңтардан бері Біріккен Араб Әмірліктерінде оқу-жаттығу жиындарын өткізіп жатыр. Басты мақсат – оңтайлы физикалық нормаға келіп, ресми матчтарға дайындалу. «Қайрат» чемпиондар лигасы аясында 20 қаңтарда бельгиялық «Брюггені» қабылдаса, 28-і лондондық «Арсеналға» қонаққа барады.       

«Алтай» жаңа маусымға дайындалып жатыр

Қазақстан премьер-лигасында ойнайтын клубтар маусым алдындағы дайындықтарын бастап кетті. Олардың арасында Өскеменнің «Алтай» командасы да бар. Шығыс қазақстандықтар өткен маусымда бірінші лигада 3-орын алып, 13 жылдық үзілістен кейін премьер-лигаға қайтып оралды. Қазір Вахид Масудовтың шәкірттері Астанада оқу-жаттығу жиындарын өткізіп жатыр. Командада болашағынан үлкен үміт күттіретін жергілікті жастар ойнайды.

Тимур Реджепов, «Алтай» клубының ойыншысы:

- Дайындық жақсы өтіп жатыр. Қазір бастапқы апта. Физикалық тұрғыда бірқалыпқа келіп жатырмыз. Осы командада қалғаныма өте қуаныштымын. Өскемен өңірінің жанкүйерлеріне тек алғыс айтамыз алдыңғы жылы қолдау білдіргендеріне. Енді осы жылы бұйырса дәл сондай қолдау білдірсе бұдан да асып түсеміз деп ойлаймын.       

Вахид Масудов, «Алтай» клубының бас бапкері:

- Жігіттер премьер-лигаға шыққандарын жақсы түсінеді. Алда команданы бұрынғыдан да қиын әрі ауыр ойындар күтіп тұр. Енді байыпты түрде дайындалып, жаңа маусымда жаңа деммен ойнаймыз. Клубтың алдына қойған мақсаты Қазақстан премьер-лигасында тұрақты ойнап, турнирлік кестеде жоғары көтерілу. Әрине ішкі чемпионат оңай емес. Бізде жастар өте көп. Енді құрамды Сергей Хижниченко секілді тәжірибелі футболшылармен толықтыратын уақыт келді.  

Депутат: спортқа бөлінген ақша ақталуы керек

Қысқы олимпиада ойындарында жақсы нәтиже көрсету үшін 4 жыл жеткілікті. Алайда жауаптылар жүйелі жұмыс жүргізе алмай, тек бір медальды қанағат қылып отыр. Мәжіліс депутаты Данияр Қасқарауов осылай дейді. Ол қысқы ойындарға  бөлінген 13 млрд теңгеден астам ақшаның есебін сұрап, ашық жариялауды талап етті. Яғни бөлінген қаражат аз емес. Сондықтан ел азаматтарының спортшылардан жоғары нәтиже күтуі орынды әрі заңды екенін алға тартады. 

Данияр Қасқарауов,  ҚР Парламенті Мәжілісінің депутаты:

- Мемлекет тарапынан спортшыларға қолдау көрсетілді, дайындықтарына барлық мүмкіндікті жасады. Соған қарамастан министрліктің жауабында қай спорт түрінен немесе қай спортшы екенін білмей отыр. Бір медаль күтеміз деп жауап берді. Бұл жерде айтқым келіп отырғаны қысқы спорт түрлерінен ең бірінші қаражаттың дене шынықтыру және спорт ақпарат сайттары 2022 жылдан бері жаңартылмаған. Ол жерде ешқандай мәлімет жоқ. Қаражаттың қалай, қайда жұмсалып жатқаны туралы ақпарат алу мүмкін емес. 

Сондай-ақ депутат елдегі спорт мектептеріне қатысты түйткілді мәселелерге тоқталды. Мысалы Алматы облысындағы  қысқы ойын түрлеріне арналған «Алатау» спорт кешені үш жылдан бері жабық тұр. Есесіне ел қазынасынан оның құрылысына 2022 жылы 3 млрд теңге қаржы бөлінген. Дегенмен жұмысы тоқтап тұр дейді.   

Данияр Қасқарауов, ҚР Парламенті Мәжілісінің депутаты:

- Кешен толық жұмыс істемегеніне қарамастан жыл сайын мемлекеттен 1 млрд теңге қаражат бөлініп жатыр. Мына Риддер қаласында олимпиадаға резерв дайындайтын арнаулы мектеп ашылған. Ол жерде 250-ден астам жас спортшы дайындалуда. Осы спортшылардың жақсы дайындықтан өтуіне ел қазынасынан жылына 2 млрд-тай қаржы бөлінеді. Осындай мемлекет бөлген қаржыдан кейін жастардан олимпиадаға резервтер беру керек қой.