Қайсар Қамза ісіндегі жаңа есімдер күдіктілер арасында АҚШ пен Украина азаматтары бар

Қаржылық мониторинг агенттігі бұған дейін Вьетнамнан Қазақстанға экстрадицияланған блогер Қайсар Қамзаға қатысты қылмыстық істің жаңа мәліметтерін жариялады, деп хабарлайды Tengri Life.

ҚМА не деді?

Агенттіктің біздің сауалымызға берген жауабына сәйкес, Қайсар Қамза 2026 жылғы 6 тамызда Қазақстанға экстрадицияланған. Ол аса ірі мөлшерде табыс таба отырып, лицензиясыз электрондық казино мен интернет-казино қызметін заңсыз ұйымдастыруға жәрдемдесті деген күдікке ілінді.

Агенттік мәліметінше, блогер қылмыстық жауаптылыққа тарту үшін Вьетнамнан Қазақстанға жеткізілген.

"2026 жылғы 6 тамызда Қ. Қамза Қазақстан Республикасы Қылмыстық кодексінің 28-бабының 5-бөлігі және 307-бабының 3-бөлігі 2-тармағы бойынша қылмыстық жауаптылыққа тарту үшін Вьетнам Социалистік Республикасынан Қазақстан Республикасына экстрадицияланды, ол бойынша оған халықаралық іздеу жарияланған болатын", - деп хабарлады ҚМА.

Бұған дейін Бас прокуратура блогердің ісіне қатысты мән-жайды ашқан еді.

ҚМА ақпараты бойынша, осы жылдың маусымнда Қамза Вьетнам аумағында ұсталған. Бұл Қазақстан Ішкі істер министрлігі Интерполдың Ұлттық орталық бюросының сұрауы бойынша жүзеге асты.

Ұстаудан кейін Қазақстан экстрадициялау туралы сауал жолдады. Нәтижесінде блогер Қазақстан мен Вьетнам арасындағы ұстап беру туралы шартқа сәйкес қазақстандық тарапқа берілді.

"Кейіннен Бас прокуратураның сұрауы бойынша ол 2017 жылғы 15 маусымдағы Қазақстан Республикасы мен Вьетнам Социалистік Республикасы арасындағы ұстап беру туралы Шартына сәйкес, Қазақстанның Вьетнамдағы Елшілігінің көмегімен Қазақстанға экстрадицияланды", - делінген ҚМА жауабында.

Іс бойынша тағы төрт күдікті пайда болды

ҚМА бұдан бөлек тағы төрт адамның процессуалдық мәртебесі туралы хабарлады. Осы қылмыстық іс бойынша Дмитрий Дружински, Марина Левкович-Гинзбург, Дмитрий Пунин және Марина Ильина күдікті деп танылды.

Бұл ретте агенттік тергеу нұсқасы бойынша олардың әрқайсысы қандай рөл атқарғанын ашпады. Ведомство сотқа дейінгі тергеу деректерін жария етпеу туралы заңнама талаптарына сілтеме жасады.

"Сотқа дейінгі тергеп-тексерудің өзге де деректері Қазақстан Республикасы Қылмыстық-процестік кодексінің 201-бабының талаптарына сәйкес жария етуге жатпайды", - деп хабарлады ҚМА.

Дружински мен Левкович-Гинзбург туралы не белгілі?

Бұған дейін, биыл ақпанда Қаржылық мониторинг агенттігі Дмитрий Дружинскиге (1970 жылы 27 маусымда туған, АҚШ азаматы) және Марина Левкович-Гинзбургке (1985 жылы 8 қарашада туған, Украина азаматы) іздеу жариялаған болатын.

Сол кезде ҚМА олар Қазақстанда заңсыз ойын бизнесін ұйымдастырды деген күдікке ілінгенін мәлімдеген. Тергеу нұсқасы бойынша, PIN-UP және PINCO брендтерімен онлайн-казино қызметін Қазақстаннан тыс жерде жүрген бір топ адам үлеслес компаниялар желісі арқылы ұйымдастырған.

Ведомство Дружински мен Левкович-Гинзбург үйлестіруші қызметін атқарды деп мәлімдеді.

"Д. Дружински мен М. Левкович сыбайластарды іріктеуді, төлем ұйымдары мен екінші деңгейлі банктердің өкілдерімен өзара іс-қимылды, сондай-ақ ақшалай қаражатты қабылдауды және шығаруды қамтамасыз ететін төлем инфрақұрылымын құру мен оның жұмысына қатысуды жүзеге асыра отырып, үйлестірушілер қызметін атқарған", - деп хабарлады ҚМА.

Агенттік мәліметінше, заңсыз қызметті бүркемелеу үшін PIN-UP.KZ брендімен букмекерлік қызметке мемлекеттік лицензия алған "Бонами" ЖШС құрылған.

Сондай-ақ ҚМА ішінде Gold Pay ЖШС және Cyber Pay ЖШС, кейінірек Pinnacle Financial Solutions ЖШС аталған төлем ұйымдары желісінің құрылғаны туралы хабарлады. Тергеу нұсқасы бойынша, олар онлайн-казиноның төлем агрегаторлары қызметін атқарған.

ҚМА бұған дейін онлайн-казино клиенттерінен түскен ақша транзиттік шоттарда жинақталып, содан кейін үлеслес компанияларды пайдалана отырып, криптовалютаға айналдырылғанын айтқан болатын.

Сот оларды сырттай күзетпен ұстауды санкциялады.

Дмитрий Пунин деген кім?

Іс бойынша жаңа күдіктілердің арасында Дмитрий Пунин де бар. Ашық дереккөздерде ол кәсіпкер және Punin group негізін қалаушы әрі иесі ретінде белгілі. Холдингтің ресми сайтында ол Кипрде жеке бизнес-жобаларын дамытып жатқан кәсіпкер және инвестор ретінде таныстырылған.

Punin group-тың өзін әртүрлі салалардағы жобаларды біріктіретін халықаралық холдингтік компания ретінде сипаттайды. Топтың сайтында көрсетілген бағыттардың ішінде алкоголь бизнесі, HoReCa, жылжымайтын мүлік, ивент-алаңдар, сұлулық пен денсаулық және IT-шешімдер бар.

Сонымен қатар Пуниннің әлеуметтік желілерінде оның Кипрдегі жобалары туралы жарияланымдар шығуын жалғастырып жатыр. Мәселен, төрт күн бұрын ол Кипрдегі Château Punin жобасының аумағында жаңа Pinot Noir жүзімдігін отырғызуға арналған фотосурет жариялады.

Instagram-дағы бұл жарияланымды көру

Dmitriy Punin-нің (@punin) жарияланымнан

Пунин жазбасында жылына 10 мың бөтелкеге дейін шарап өндіруді жоспарлап отырғанын айтып, бұл жобаны өршіл мақсат деп атады.

Марина Ильина туралы не белгілі?

Тағы бір күдікті - Марина Ильина. Ол Instagram парақшасында RedCore компаниясының негізін қалаушы және бас директоры (CEO & Founder) екенін көрсеткен. Профилі көпшілік үшін жабық. Ол технологиялық және iGaming-бизнес саласындағы кәсіпкер ретінде танымал.

RedCore 2025 жылы PIN-UP Global трансформациясынан кейін құрылған. Компанияның хабарлауынша, топ өз жұмысын iGaming шеңберінен шығарып, бүгінде цифрлық бизнестің түрлі салаларында, соның ішінде fintech, маркетинг, электрондық коммерция, клиенттік сервистер мен реттеуші технологиялар (regulatory technology) бағытында жобаларды дамытып келеді.

БАҚ бұған дейін Ильинаны Дмитрий Пуниннің жұбайы деп атап, оны PIN-UP Foundation және RedCore (PIN-UP Global) компанияларымен байланыстырған болатын.

Қайсар Қамзаның бұған қандай қатысы бар?

Қаржылық мониторинг агенттігі (ҚМА) бұған дейін ұсынған тергеу нұсқасы бойынша, 2025 жылдың қаңтарында Қамза әлеуметтік желілер мен мессенджерлердегі аудиториясының көптігін пайдаланып, сыйақы үшін заңсыз интернет-казиноны жарнамалап, Қазақстан азаматтарын құмар ойындарға тартқан.

Агенттік блогерді лицензиясыз жұмыс істейтін электрондық және интернет-казино қызметін заңсыз ұйымдастыруға көмектесті және аса ірі мөлшерде табыс тапты деп күдіктелетінін нақтылады.

Бас прокуратура интернет-казиноны насихаттағаны үшін оның криптовалюта әмиянына 200 мың АҚШ долларына жуық қаражат түскенін хабарлады.

Ведомствоның мәліметінше, тергеу ұйымдасқан топтың қызметіне қатысты жүріп жатыр. Олар 2021-2025 жылдар аралығында Қазақстанда бірнеше заңсыз онлайн-казино жұмысын ұйымдастырып, төлем терминалдары арқылы 106 миллиард теңгеден астам қаражатты заңсыз иемденген.

Сондай-ақ прокуратура бүгінгі таңда топтың тоғыз мүшесі қамауда отырғанын хабарлады.

Instagram-дағы бұл жарияланымды көру

Qaisar Qamza (QQ) (@qais_arr) жарияланымы

Қайсар Қамза деген кім?

Қайсар Қамза - қазақстандық инфлюенсер. Оның Instagram парақшасына 2,2 миллионға жуық адам жазылған. Ол өзінің арандатушылық контентімен, сән-салтанатқа толы өмірін көрсетуімен, сондай-ақ шетелде түсірілген бейнероликтерімен кеңінен танымал болды.

Бұған дейін де блогер мемлекеттік органдардың назарына іліккен болатын. Ол жарнама туралы заңнаманы бұзғаны үшін, соның ішінде заңсыз ұтыс ойындарын өткізгені және онлайн-казиноларды насихаттағаны үшін әкімшілік жауапкершілікке тартылды. Бір жағдайда айыппұл көлемі 1,17 миллион теңгені құрады. Соған қарамастан, реттеушілердің бағалауынша, оның аккаунтының стилі мен мазмұны айтарлықтай өзгермеген.

Тағы оқыңыз: Қазақстан блогер Махмуд Хикматовқа халықаралық іздеу жариялады

Google News арқылы жаңалықтарымызды қадағалаңыз

Жазылу