Қалай өз ата бабасын жек көруге болады? : желіде Дәстүр 2 фильмі қатаң сынға ұшырады

Белгілі кәсіпкер әрі қоғам белсендісі Ахметбек Нұрсила «Дәстүр: Теріс бата» фильмін көргенін айтып, аталған фильмді қатты сынады, – деп хабарлайды Aikyn.kz сайты.

«Бүгін жұбайыммен Қанат деген сценарист бауырымның өтінішімен «Дәстүр 2 Теріс бата» деген фильмге барып қайттық. «Таптым-ау сені» деген фильмнен шыққан соң «Шошқа қораға барып тамақ ішкендей күйде» болдым деп едім. «Дәстүр 2» ден соң өлген адамның мүрдесін жеп жатқан құзғындардың арасында болғандай күй кештім!», – дейді ол. 

Оның айтуынша, фильмде қазақтың салт-дәстүрінің бәрін «ширк» қылып көрсетпек болған көрінеді.

«Қалай осындай өлермендікпен өз ұлтын, ата-бабасын жек көруге болады? Қайранмын! Әйгілі Ысқақтың стримінде «Қазақтың жарты жерін арабтарға бере салу керек» деп шатып отырған арабқұлдарды тыңдап, жаным аза-қаза болып еді. Бүгін мынаны көріп, бұл сұмдықтың қалай терең тамыр алып кеткенін көріп шошып отырмын», – дейді Ахметбек Нұрсила. 

А. Нұрсила бұл фильмдер қазақтың түп-тамырына сілтеніп жатқан балта дейді.

«Жастар толып отыр, билет басқа киноларға қарағанда екі есе қымбат! Кино мен үшін «ужас», яғни қорқынышты болған жоқ! Бірақ ниеті арам адамдардың жүрек айнытатындай сұмпайы пиғилы, өз ұлтына деген өлермендікпен жасалып жатқан қастандығы жаға ұстатты! Айға қарап ұлыған, екі аяқты сұмпайы жауыздың арам пиғылынан құса болған қасқырдың жағдайы дәл қазір Қазақтың басына келген екен! Өмірден түңіліп кеттім! Сұмдық! Қайда кетіп барамыз», – деп жазды.