Қарағанды облысы Шет ауданында антына адал ақ халатты абзал жан тұрады

«Алтын қолды» алғыс арқалаған дәрігер.

Қарағанды облысының Шет ауданында тұратын Күлшайда Шоқанқызын ауылдастары осылай деп атайды. Білікті акушердің көмегімен 300-ден астам жүкті әйел аман-есен босанып, аяқ-қолын бауырына алған. 

Күлшайда Шоқанқызы Талды ауылындағы медициналық пунктте табан аудармастан 24 жыл жұмыс істеді. Ширек ғасырға жуық еңбек өтілінде ол небір қиын сәттерді бастан өткерген. Әсіресе ай-күні жетіп, толғағы қысқан ананы сайын далада босандырғаным естен кетпейді, дейді.   

Күлшайда Шоқанқызы, денсаулық сақтау саласының ардагері: 

- Әлгі әйелдің толғағы үйден шыққанда қатты болмай тұрғаннан кейін мен жарайды Қарағандыға жеткізем дегем. Содан Қарағандыға апара жатқанда жолда шыдамай бара жатыр. Спаскіге тақалған уақытта. Содан не істеймін? Шопырды тұрғызып қойып, аман-есен босандырып алып, далада біраз тұрып, жағдайын жасап, үйге қайтып келдік. 

Бұл Күлшайда Шоқанқызының бір кездері қолданған қызметтік қобдишасы. Дәрі-дәрмек пен медициналық құралдар салынған чемоданның бір кісіге жүк болатындай салмағы бар. Соны көтере жүріп ол, ауылдарды аралап, сырқаттанғандарды емдеген. 

Күлшайда Шоқанқызы, денсаулық сақтау саласының ардагері:

- Обход жасаймын. Дәрілерін беремін. Үйге қайтам. Әйелдерді учетқа алам. Аяғы ауыр болғандарды. Жол жоқ, боран, масқара. Жазға салым жүру қиын. 75-78 ге дейін аналарды үйде босандырдым. Бір күнде екі әйелден толғатқан күндері бар.

Білікті дәрігер тоқсаныншы жылдардағы өтпелі кезеңдерде де мамандығынан бас тартқан жоқ. Уақытпен санаспай бар қиындықты еңбекпен еңсере білген жан қазір ауылдастарының сый-құрметіне бөленіп жүр. 

Қарашаш Маукешова, Талды ауылының тұрғыны:

- Көп дәрігерлер келеді, кетеді. Ал ол кісі соншама жыл ауылда тұрып бізге көмегі көп болды. Енді ол кісі жүрегі сондай мейірімді адам. Бұл кісінің дауысы Күләш Байсейітованың дауысындай. Ана «Гәккуді» айтқанда бәріміз айтатынбыз бұл кісі неге ауылда қалды? Алматыда, Мәскеуде сценада ән айтатын адам деп. Сондай жан-жақты кісі. 

77 жастағы Күлшайда Шоқанқызы қызмет бабында жас мамандарға ұстаз әрі қамқоршы бола білді. Оның еңбек жолы кейінгі буынға әрдайым үлгі-өнеге.  

Сәуле Рахметоллақызы, Талды ауылдық медициналық пункттің мейірбикесі:

- Ол кісінің қолы даже укол салады ғой, білмей қаласың. Қолы прям целофан сияқты. Жұп-жұмсақ. Ана кісінің сөзіне қарап, уже  толғатып отырасың. Әр баланы туғанда өте қатты қуанады. Осы ауылдағы жартысы Күлшайда Шоқановнаның баласы ғой.

Күлшайда Шоқанқызы құрметті демалысқа шығып, бейнетінің зейнетін көріп отыр. Ақ жаулықты әже қазір немере-шөберелерін де ақ-адал қызмет етуге, елдің батасын алуға баулып жүр.

 Шыңғыс Қалиден, Лиана Жамлиханова, Аман Хамит