Қарағанды облысында 600 ден астам лифтінің пайдалану мерзімі өтіп кеткен

Қарағанды облысында 600-ден астам лифтінің пайдалану мерзімі өтіп кеткен.

Тек облыс орталығының өзінде жүздеген үй жарты ғасыр бұрын орнатылған жеделсатыларды пайдаланып келеді. Биыл мемлекеттік бағдарлама аясында бар болғаны 25 лифтті ауыстыру жоспарланған. Жаңғырту жұмысы неге баяу?

Руслан Нұрланұлы, тілші:

- Жарамсыз болған лифт өте көп. Олардың кейбіріне тіпті жарты ғасырдан асып кеткен. Мысалы, Қарағандының қақ ортасындағы мына үйдің жеделсатысының қаңтарулы тұрғанына біраз болған. Өңірде осындай жұмыс істемей тұрған 150-ден астам лифт бар. 

Бұған қоса жұмыс істеп тұрса да, жарамдылық мерзімі баяғыда өтіп кеткен 400-ден астам лифтіні ауыстыру қажет. Олардың басым бөлігі тұрғындардың қауіпсіздігіне қатер төндіріп отыр, дейді мамандар.

Данияр Дүйсембаев, тұрғын үй қорын жаңғырту орталығының директоры:

- Көбі 40-50 жыл бұрын орнатылған. Жыл өткен сайын оларды пайдалану қауіпті болып барады. Себебі металы шіріп кеткен, көтергіш механизмі тозған. Қайта жөндеу мүмкін емес. Сондықтан жаппай жаңалаған жөн. 

Жеделсатысы істен шыққан үй тұрғындарына өте қиын. Әсіресе қарт адамдар мен мүгедектігі бар жандар далаға шыға алмайды. 

Алексей Коровиков, қала тұрғыны:

- Менің жасым 74-те, баспалдақпен көтерілу өте қиын. Сегізінші қабатта кішкентай балалары бар адамдар тұрады. Оларды күн сайын арқалап жүреді. Біз жеделсатыны ауыстыруға өтініш жазғанбыз. Биыл жаңалап береміз деген. Бірақ нақты қай кезде екені белгісіз. 

Қазір жарамдылық мерзімінен 2-3 есе асыра пайдаланылған лифтілердің біразы тоқтатылған. Жаңа лифтіні тұрғындар өз қаражатына немесе тұрғын үйді жаңғыртудың мемлекеттік бағдарламасы арқылы орната алады. Бағдарламада лифтінің құнын 8 жылға дейін бөліп төлеу мүмкіндігі қарастырылған. Мысалы, мына тоғыз қабатты үйде жеделсаты осы жүйе арқылы жаңартылған. 

Любовь Чеканова, қала тұрғыны:

- Былтыр бізге лифтіні ауыстырып берді. Қазір жоғарғы қабаттарға қиналмай көтерілеміз. Ескі лифт сықырлап, тербеліп тұратын, кейде ішінде қалып та қоятынбыз. 

Былтыр өңірде мемлекеттік бағдарлама аясында көпқабатты үйлерде 51 лифт ауыстырылды. Ал биыл Қарағанды мен Теміртауда 25 жеделсатыны жаңарту жоспарланған.

Данияр Дүйсембаев, тұрғын үй қорын жаңғырту орталығының директоры:

- Қазір қаржыландыру тоқтатылған. Біз республикалық бюджетке өтінім жасадық. Сонымен қатар жеке компаниялар арқылы инвестиция тарту мәселесін де пысықтап жатырмыз. Облыстық бюджет есебінен жобалық-сметалық құжат та дайын. Яғни барлық қаржыландыру көзін қарастырып, жаңғырту жұмысын жеделдеткіміз келеді.  

Мамандардың айтуынша, қазір ескі лифтілерге қажетті қосалқы бөлшектер еш жерде шығарылмайды. Сондықтан жаппай жаңартудан басқа амал жоқ. Ал жаңа жеделсатылар биылдан бастап Алматы мен Астанадағы отандық өндірушілерден сатып алынуы тиіс. 

Руслан Нұрланұлы, Сайран Ақамбаев, Аман Хамит