Қарағанды облысында мектептерге заманауи жабдықтар алынды

Теміртауда мектептер заманауи құрал-жабдықтармен қамтылды.

Бұл — «Қазақстан халқына» қоры жүзеге асырған кең ауқымды жобаның нәтижесі. Білім беру мекемелері футбол және баскетбол алаңдары, воркаут аймақтары, сондай-ақ хоккей корттарымен толықты. Бұл оқушылардың спортпен шұғылданып, белсенді демалуына қолайлы жағдай жасауға мүмкіндік береді.

Теміртаудағы №8 мектепте бүгін мереке. Оқушылар көптен күткен заманауи спорт алаңы ашылды. Онда дене шынықтыру пәніне, балалардың жалпы дамуына қажетті дүниелердің бәрі қарастырылған. Тренажерлер, футбол алаңы мен баскетбол аймағы оқушылардың арманы еді. Жаңа алаңда қосымша спорт секциялары өткізіледі. Каратэ бойынша жаттықтырушы Нұрсултан Қожамұратов бұл жобаның қалада спорттың дамуына тың серпін береріне сенімді.

Нұрсұлтан Қожамұратов, жаттықтырушы:

- Өте керемет, Әр көшелерде қала бойынша спортшыларға осындай қолдау болып жатқаны керемет! Басқа қаланың шетіне бармай, әркім өзінің көшесінде жаттыға алады. Міне, баскетбол, футбол үйірмесіне қатысуға өте жақсы мүмкіндік.

Спортпен қатар «Қазақстан халқына» қоры ғылымға да ерекше назар аударып келеді. Теміртау мектептеріндегі физика, химия және биология кабинеттері заманауи құрал-жабдықтармен жабдықталып, жаңа жиһазбен толықтырылды. №17 мектептің оқушысы Әнел Ермаханова биология пәнін ерекше жақсы көреді. Жаңа жабдықтар мен микроскоптың арқасында терең зерттеулер жүргізіп, білімін одан әрі шыңдай алады.

Әнел Ермаханова, оқушы:

- Осы микроскоп арқылы қан топтарын, жасушаларды, ұлпаларды микроскоптан бөлімдерін, осының барлығын өтіп жатырмыз. Биология пәніне басқа әдемі құралдар мен оқуға арналған құралдар келген соң, биология пәні ең сүйікті пәніме айналды.

Бұдан бөлек, Қарағанды облысында қосымша білім беру ұйымдарының жетеуі заманауи жабдықтармен қамтылды. Сонымен қатар 35 үйірме жаңғыртылып, робототехника мен бағдарламалаудан бастап 3D-модельдеу және киберспортқа дейінгі бағыттарды қамтитын 21 жаңа үйірме ашылды.

Ләззат Шыңғысбаева, «Қазақстан Халқына» ҚҚ басқарма төрағасы:

- Мына инженерлік саласына балаларды бағыттап, тартатын, дамытатын төрт жаңа, мүлдем болмаған үйірмелерді ашып бердік және де жұмыс істеп жатқан алты үйірменің құрал-жабдықтарының барлығын жаңартып бердік. Мамандарды оқыттық, оның да бүгін нәтижесін көруіміз керек. Теміртау қаласына Қарағанды облысынан бөлек алсақ, 4 миллиард 700 миллион теңгеге бүгінгі күнге жасалып жатқан, аяқталған, іске қосылып жатқан жобалар, оның ішінде 700–і ол денсаулық  пен әлеуметтік саласы болса, 4 млрд теңгесі тек қана мына білім саласында.

«Қазақстан халқына» қоры облыстағы 86 мектепте физика, химия және биология кабинеттерін толық жабдықтап берді. Сонымен бірге педагогтар арнайы курстардан өтіп, заманауи оқыту әдістемелерін меңгеруге мүмкіндік алды. 

Авторлары: Қарлығаш Қасиетова, Лиана Жамлиханова, Сайлау Игіліков, Аман Хамит