Қарағандыда дропперлікпен айналысқан екі студентке үкім шықты

Дропперлік – азаматтардың үшінші тұлғаларға өздерінің банктік шотына, төлем картасына немесе сәйкестендіру құралдарына заңсыз қолжетімділік беруі, сондай-ақ оларды ақшалай сыйақы не өзге де мүліктік пайда үшін пайдалануға ұсынуы.

Қазіргі таңда дропперлік интернет-алаяқтық схемаларының негізгі тетіктерінің біріне айналған. Дропперлердің шоттары арқылы қылмыскерлер ұрланған қаражатты қолма-қол ақшаға айналдырып, иемденеді.

- Қарағанды қаласының Қазыбек би атындағы аудан прокуратурасы Қылмыстық кодекстің 232-1-бабы 1-бөлігі бойынша қылмыстық теріс қылық жасаған екі тұлғаға қатысты мемлекеттік айыптауды қолдады.

Сотталушылар ақшалай сыйақы үшін өз банктік шоттарын үшінші тұлғаларға берген студенттер болып шықты. Сот отырысында олар кінәларын толық мойындап, жасаған әрекеттеріне өкінетіндерін білдірді. Кінә ұсынылған дәлелдемелер жиынтығымен толық расталды, - деп жазды қадағалаушы органнан.

Істі қарау қорытындысы бойынша сот айыпталушыларды кінәлі деп танып, айыппұл түріндегі жаза тағайындады. Үкім заңды күшіне енген жоқ.

Прокуратура ескертеді: банктік карталарды, шоттарды және жеке деректерді бөгде адамдарға «уақытша» немесе «қосымша табыс табу үшін» беру қылмыстық жауапкершілікке әкеп соғады.

Айта кетейік, бұған дейін киберполицейлер бірнеше алаяқтық схемаға қатысы бар дропперді ұстады.