Қарағандыда полиция ғимаратынан мәйіт табылды: бірнеше адам қызметінен кетті

АЛМАТЫ, 21 қазан – Sputnik. Қарағанды қаласы Михайлов полиция бөлімінің басшысы мен орынбасары қызметінен босатылды, деп хабарлайды облыстық полиция департаменті

Тірек пунктінде болған оқиғаға қатысты қызметтік тергеу және тәртіптік комиссияның отырысы өткен.

"Михайлов полиция бөлімінің басшысы мен орынбасары лауазымынан босатылды. Бұдан басқа, Қарағанды қаласы полиция басқармасының және облыстық полиция департаментінің бірқатар басшы қызметкері қатаң тәртіптік жауапкершілікке тартылды", - дейді ведомство.

Азаматтың денесін табу фактісі бойынша сотқа дейінгі тергеу жүріп жатыр. Ал ес-түссіз табылған полиция инспекторы қызметінен шеттетілді. Ол әлі ауруханада, емдеу аяқталғаннан кейін оны жұмыстан шығару мәселесі қарастырылады, дейді полиция департаменті.

Еске сала кетейік, 1 қазанда Қарағандыда учаскелік тірек пунктінен әйелдің мәйіті мен ес-түссіз жатқан полицей табылды. Полиция инспекторы комада, жансақтау бөліміне жатқызылған. Сол кездегі жағдайын дәрігерлер ауыр деп бағалады.