Қарызсыз қоғам жобасы жұмыс берушілердің қолдауына ие болды

Құжат «Қарызсыз қоғам» партиялық жобасын жүйелі жүзеге асыруға, қызметкерлердің несиеге тәуелділігін азайтуға, олардың қаржылық сауаты мен тұрақтылығын арттыруға, сондай-ақ отбасылар мен еңбек ұжымдарының әлеуметтік тұрақтылығын нығайтуға бағытталған, - деп хабарлайды Aikyn.kz

Іс-шараға «AMANAT» партиясының Атқарушы хатшысы Дәулет Кәрібек және «PARYZ» Ұлттық жұмыс берушілер конфедерациясы президиумының төрағасы Жұмабек Жанықұлов қатысты. 

«AMANAT» партиясының Атқарушы хатшысы «Қарызсыз қоғам» жобасы кейінгі жылдары партиялық бастамадан ауқымды жалпыұлттық бағдарламаға айналғанын және қиын қаржылық жағдайға тап болған азаматтарды қолдау құралы ретінде өз тиімділігін дәлелдегенін атап өтті.

«Қарызсыз қоғам» жобасы Мемлекет басшысы Қасым-Жомарт Тоқаевтың қолдауына ие болды. Биыл Президент өз Жолдауында оны одан әрі жүзеге асыру және дамыту қажет екенін тағы да атап өтті. Жобаның құндылығы формалды көрсеткіштермен емес, айқын нәтижелермен және азаматтарға тигізетін нақты пайдасымен өлшенеді. «Қарызсыз қоғам» жобасының тиімділігі партияның, мемлекеттік органдардың, қаржы институттары мен қоғамдық құрылымдардың бірлескен күш-жігері арқылы қамтамасыз етіледі. Мұндай өзара іс-қимыл күрделі қоғамдық міндеттерді шешудегі әлеуметтік әріптестіктің әлеуетін айқын көрсетеді. Осы тұрғыда «PARYZ» ҚР Ұлттық жұмыс берушілер конфедерациясымен ынтымақтастық туралы Меморандумға қол қою қисынды әрі уақтылы шешім болып отыр», – деді Дәулет Кәрібек.

Меморандум «Қарызсыз қоғам» жобасын жүзеге асыру шеңберінде тараптар ынтымақтастығының жалпы қағидаттарын, бағыттары мен нысандарын айқындайды. Оның мақсаты – азаматтардың борыш жүктемесін азайтуға, жауапты қаржылық мінез-құлық қалыптастыруға және еңбек ұжымдарының қаржылық тұрақтылығын арттыруға бағытталған әріптестік қатынастарды орнату әрі ұзақ мерзімді, жүйелі және тиімді өзара іс-қимылды дамыту.

Құжат аясында қызметкерлерге кеңес беру, ақпараттық және заңгерлік көмек көрсету, оқыту іс-шараларын жүргізу, түсіндіру материалдарын әзірлеу және тарату, сондай-ақ несиеге тәуелділіктің жүйелі себептерін бірлесіп талдау және әрекет ету шараларын әзірлеу көзделуде.

Ұйымдастырушылық өзара іс-қимыл шеңберінде тараптар бірлескен іс-шаралар жоспарын әзірлеу және жобаны сүйемелдеу үшін цифрлық құралдарды пайдалану мүмкіндігі туралы уағдаласты.

Өз кезегінде, «PARYZ» Ұлттық жұмыс берушілер конфедерациясы президиумының төрағасы Жұмабек Жанықұлов қызметкерлер мен жұмыс берушілер арасында тұрақты қарым-қатынас болмайынша, лайықты еңбек, әділетті жалақы және қауіпсіз жағдай жөніндегі халықаралық стандарттарды жүзеге асыру мүмкін емес екенін атап өтті. Оның айтуынша, меморандум осы бағыттар бойынша жүйелі және бірлескен жұмыстың негізін қалайды.

«Қарызсыз қоғам» – «AMANAT» партиясының бастамасымен қолға алынған өте маңызды және уақтылы жоба. Біз әрдайым бірлескен жұмысқа белсенді атсалысуға дайынбыз. Партиямен бірлесіп жұмыс берушілерді қаржылық сауаттылықты арттыру және несие жүктемесін азайту бағдарламаларына тарту – маңызды қадам деген ойдамыз. Бұл өз кезегінде қызметкерлерге қолайлы жағдай жасайды. Бүгінде өңірлерде әлеуметтік диалог орталықтары ашылды. Мәселен, жуырда Шығыс Қазақстан облысы Өскемен қаласында осындай орталық өз қызметін бастады. «AMANAT» партиясының және кәсіподақтардың атсалысуымен осы орталықтарда қызметкерлердің қарыз берешегі мәселесін шешу бойынша жүйелі жұмыс жүргізілуде», – деді Жұмабек Жанықұлов.

Іс-шара қорытындысы бойынша тараптар «AMANAT» партиясы мен «PARYZ» ҚР Ұлттық жұмыс берушілер конфедерациясы арасындағы ынтымақтастық әлеуметтік тұрақтылықты нығайтуға, қызметкерлердің мүддесін қорғауға және елдегі әлеуметтік әріптестікті одан әрі дамытуға ықпал ететініне сенім білдірді.