Қашықтан жұмыс істеу және қосымша автобустар 1 қыркүйекте Алматыны ne күтіп тұр

Алматыда қыркүйектің алғашқы күндері жолдар мен қоғамдық көлікке түсетін салмақ айтарлықтай артады деп күтіледі. Жаңа оқу жылының басталуына байланысты қала әкімдігі көлік жүктемесін азайту және балалар мен тұрғындардың қауіпсіздігін қамтамасыз ету үшін кешенді шаралар дайындады, деп хабарлайды Tengrinews.kz.

300 мектеп автобусы және 470 полицей

Оқушыларды тасымалдау үшін 60 мектепке қызмет көрсететін 300 мектеп автобусы жұмылдырылады. Олар 13 мыңнан астам баланы қамтиды.

1 қыркүйек күні таңертең мектептердің жанында, жаяу жүргіншілер өткелдерінде және ең көп жүктеме түсетін учаскелерде жол қозғалысын реттеу күшейтіледі. Кезекшілікте 470 полиция қызметкері болады.

Тұрғындардан жеке көліктерімен мектеп кіреберістеріне дейін бармауды және мүмкіндігінше алдын ала баламалы қозғалыс жолдарын таңдауды сұрайды.

Жолға тағы 500 автобус шығады

Оқу жылының алғашқы екі аптасында қоғамдық көліктің жұмысы күшейтіледі. Қолданыстағы 3 200 автобустан бөлек, резервтен қосымша 500-ге жуық автобус шығарылады.

Қосымша көлік ең көп жүктеме түсетін маршруттарға бағытталады. Бұл желілердегі автобустар санын көбейтуге және қарбалас уақытта қозғалыс аралығын қысқартуға мүмкіндік береді.

Өзгерістер метроға да қатысты болады. Пойыздар саны 11-ден 13 құрамға дейін артады, соның арқасында таңғы уақытта пойыздар арасындағы интервал үш минутқа дейін қысқарады.

Қауіпсіздікті күшейту

Оқу жылы басталғанға дейін мамандар әкімшілік полициямен бірлесіп, білім беру ұйымдарының жанындағы жол инфрақұрылымын тексерді.

Бағдаршамдарға, жол белгілері мен таңбаларына ерекше назар аударылды. Тексеру қорытындысы бойынша 140-тан астам ескерту жойылды. Қажетті жұмыстар барлық білім беру ұйымдарының маңында орындалды.

Мектеп аумақтары да тәулік бойы бейнебақылауда болады.

Жүк көліктерінің қозғалысы шектеледі

Қыркүйектің бірінші аптасында жүк көлігі қозғалысына бақылау күшейтіледі.

Қолданыстағы шектеулерге сәйкес, салмағы 8 тоннадан асатын жүк көліктеріне белгіленген учаскелерде сағат 7:00-ден 22:00-ге дейін қозғалуға тыйым салынады. Қаланың тыныс-тіршілігін қамтамасыз ету үшін қажетті тасымалдар бұған жатпайды.

Кімдерге қашықтан жұмыс істеу ұсынылды?

1-5 қыркүйек аралығында әкімдік қызметкерлерінің бір бөлігі қашықтан жұмыс істеу форматына көшеді. Алматының орталығында орналасқан ірі компанияларға, банктерге және басқа да ұйымдарға қыркүйектің алғашқы күндері қызметкерлердің бір бөлігін уақытша қашықтан жұмыс істеуге көшіру немесе жұмыс күнінің басталу уақытын икемді ету мүмкіндігін қарастыру ұсынылды.

Сондай-ақ қызметкерлерге қоғамдық көлікті пайдалану ұсынылады.

Алматылықтарға қандай кеңес беріледі?

Қала билігі тұрғындарға бағыттарын алдын ала жоспарлауды және мүмкіндігінше таңғы уақытта жеке көлікпен қажетсіз сапарлардан бас тартуды ұсынады.

Автокөлік жүргізушілеріне балама ретінде оқу жылының алғашқы апталарында күшейтілген режимде жұмыс істейтін қоғамдық көлік пен метроны таңдау ұсынылады.

Google News арқылы жаңалықтарымызды қадағалаңыз

Жазылу